.gif)
.gif)
.gif)
.jpeg)
.png)
काठमाण्डौ । अविरल वर्षा र पहिरोका कारण अवरुद्ध कालीगण्डकी करिडोर पूर्ण रूपमा सञ्चालनमा आउन अझै करिब एक साता लाग्ने भएको छ ।
मालढुंगा–बेनी–जोमसोम–कोरला सडक आयोजनाका प्रमुख तेजस्वी शर्माका अनुसार पर्वतको मालढुंगादेखि मुस्ताङस्थित नेपाल–चीन सीमासम्मको करिब २०२ किलोमिटर सडक खण्डमा ४६ स्थानमा पहिरो गएको छ । तीमध्ये केही ठाउँमा लेदो थुप्रिएको छ भने केही स्थानमा ढुंगासहितको पहिरो र नदी कटानका कारण सडक नै बगेको अवस्था छ ।
सबैभन्दा जटिल अवस्था म्याग्दीको बेनीदेखि मुस्ताङ प्रवेशद्वार घाँसासम्मको करिब ४५ किलोमिटर खण्डमा देखिएको छ । यस क्षेत्रमा चार स्थानमा सडक पूर्ण रूपमा बगेको आयोजनाले जनाएको छ ।
गलेश्वर, राहुघाट पुल, बैसरी, सिरुबारी, बेगखोला, महभीर, भिरकाटे, पोखरेबगर, नौनीबगर र तातोपानी कुण्ड आसपासका क्षेत्रमा सडकमा ठूलो क्षति पुगेको छ ।
आयोजना प्रमुख शर्माका अनुसार केही स्थानमा पुरानै सडक उकासेर सञ्चालन गर्नुपर्नेछ भने केही ठाउँमा नयाँ ट्र्याक खोल्नुपर्ने अवस्था छ । पोखरेबगर क्षेत्रमा पुलको एप्रोचसमेत बगेको छ ।
उनले क्षतिग्रस्त संरचना पुनःनिर्माण गर्दै सडक पूर्ण रूपमा खुलाउन कम्तीमा एक साता लाग्ने अनुमान गरिएको बताए ।
यद्यपि मालढुंगा–बेनी खण्ड भने मंगलबार साँझसम्म सञ्चालनमा ल्याउने लक्ष्य छ । करिब १३ किलोमिटर लामो उक्त खण्डमा सामान्य प्रकृतिका पहिरो रहेकाले पन्छाउने काम तीव्र रूपमा भइरहेको छ ।
त्यस्तै, मुस्ताङको घाँसादेखि कोरलासम्मको १५० किलोमिटरभन्दा बढी सडक बुधबार साँझसम्म खुलाउने लक्ष्य राखिएको छ । यस क्षेत्रमा धेरै ठाउँमा लेदोसहितको पहिरो गएको भए पनि तुलनात्मक रूपमा छिटो हटाउन सकिने अवस्था रहेको आयोजनाले जनाएको छ ।
मुस्ताङ खण्डमा लेतेखोला, पाण्डाखोला, एक्लेभट्टी, कागबेनी, तिरीगाउँ र छुसाङलगायत स्थानमा पहिरो गएको छ । मार्फामा कल्भर्ट अवरुद्ध भएर सडकबाटै पानी बगेको छ ।
यस्तै, माथिल्लो मुस्ताङका घ्याकर खोला, चैले, समर खोला र झोखोलामा नदीले सडक कटान गरे पनि वैकल्पिक व्यवस्थाबाट छिट्टै सडक सञ्चालनमा ल्याउन सकिने अपेक्षा गरिएको छ ।
(1).gif)
सडक नै बगेका ठाउँमा चुनौती
लेदोसहितको पहिरो हटाउन एक्स्काभेटर प्रयोग गरी केही घण्टामै सडक खुलाउन सकिने भए पनि सडक नै बगेका वा नदीले ट्र्याक काटेका क्षेत्रमा समस्या जटिल बनेको छ ।
रुप्से, काभ्रेभीर र खहरेखोलाजस्ता क्षेत्रमा ठूला ढुंगा खसेकाले हेभी इक्विपमेन्ट प्रयोग गरेर चट्टान फुटाउँदै सडक खुलाउने तयारी छ ।
भिरकाटे, तातोपानी र नाच्याङ क्षेत्रमा भने सडक नै कटान भएकाले पुरानै ट्र्याक उकास्ने वा नयाँ ट्र्याक खोल्ने विकल्पमा काम भइरहेको छ ।
आयोजना प्रमुख शर्माका अनुसार भौगोलिक अवस्था जटिल भएकाले माथिल्लो भाग काटेर नयाँ ट्र्याक खोल्न सजिलो छैन । त्यसैले सम्भव भएसम्म तल्लो भागबाट बेस उठाएर सडक पुनः सञ्चालन गर्ने योजना छ ।
तर नदीको बहाव अझै पूर्ण रूपमा नघटेकाले यस्तो काम जोखिमपूर्ण र समय लाग्ने देखिएको छ ।
व्यापार र पर्यटनमा पनि असर
कालीगण्डकी करिडोर अवरुद्ध हुँदा कोरला नाका हुँदै हुने नेपाल–चीन व्यापार प्रभावित भएको छ ।
रसुवा–केरुङ र तातोपानी नाका बन्द रहेको अवस्थामा कोरला नाका चीनसँगको महत्वपूर्ण वैकल्पिक व्यापारिक मार्गका रूपमा प्रयोग भइरहेको थियो ।
दशैँको मुखमा लत्ताकपडा, सवारी साधन तथा भेडाच्याङ्ग्रा आयात हुने समयमा सडक अवरुद्ध हुँदा व्यापारीहरू प्रभावित भएका छन् ।
त्यस्तै, मुख्य पर्यटकीय सिजन सुरु हुने बेला घाँसा, कालोपानी, टुकुचे, जोमसोम, मुक्तिनाथ र उपल्लो मुस्ताङ जाने सडक बन्द हुँदा होटल तथा पर्यटन व्यवसायमा पनि असर परेको छ ।
सडक अवरुद्ध हुँदा स्थानीय आवागमन, भन्सार पहुँच र पर्यटकको यात्रा समेत ठप्प भएको छ ।
.png)
.gif)
.gif)
.gif)
प्रतिक्रिया
0 प्रतिक्रियाअहिलेसम्म कुनै प्रतिक्रिया छैन। पहिलो प्रतिक्रिया तपाईंको हुन सक्छ।