‘धम्की’पछि बेलायतस्थित अमेरिकी एयरबेसबाट बी–१ बमवर्षक फिर्ता

NEWS
मंगलवार, आश्विन २०,२०८३ 10:46:23

काठमाण्डौ । बेलायतस्थित आरएएफ फेयरफोर्ड एयरबेसमा सुरक्षा जोखिम देखिएपछि अमेरिकाले त्यहाँ तैनाथ बी–१ बमवर्षक विमान फिर्ता बोलाएको अमेरिकी राष्ट्रपति डोनाल्ड ट्रम्पले बताएका छन् ।

अमेरिकी रक्षा मन्त्रालयले आइतबार आरएएफ फेयरफोर्डमा तैनाथ करिब एक दर्जन बी–१ बमवर्षक विमानलाई अमेरिकास्थित तिनका गृहआधारतर्फ फर्काइएको पुष्टि गरेको थियो ।

सोमबार नेब्रास्कातर्फ जाँदै गर्दा पत्रकारसँग कुरा गर्दै ट्रम्पले विमानहरू सामान्य प्रक्रियाअन्तर्गत नभई सम्भावित धम्कीका कारण हटाइएको बताएका हुन् ।

“उनीहरू संयोगले त्यहाँबाट उडेका होइनन्, केही धम्कीहरू थिए,” ट्रम्पले भने । अमेरिकी प्रशासनलाई ती धम्की दिने व्यक्तिहरूको पहिचानसमेत थाहा रहेको उनले दाबी गरे पनि विस्तृत विवरण सार्वजनिक गरेनन् ।

अमेरिकी सञ्चारमाध्यमहरूले विमान र त्यहाँ कार्यरत सैनिकमाथि सम्भावित तोडफोड वा आक्रमणको जोखिम देखिएपछि बमवर्षक हटाइएको हुन सक्ने जनाएका छन् । तर अमेरिकी अधिकारीहरूले धम्कीको वास्तविक स्वरूपबारे औपचारिक विवरण सार्वजनिक गरेका छैनन् ।

घटनालाई सेप्टेम्बर २७ मा आरएएफ फेयरफोर्ड नजिक देखिएका तीन शंकास्पद सवारीसाधनसँग जोडेर हेरिएको छ । त्यस घटनापछि आतंकवादविरोधी प्रहरीले अनुसन्धान अघि बढाउँदै पाँच जनालाई पक्राउ गरेको थियो । पछि उनीहरू धरौटीमा रिहा भएका थिए । पक्राउ परेकामध्ये एक बेलायती–इरानी नागरिकसमेत रहेको बताइएको छ ।

अमेरिकी उपराष्ट्रपति जेडी भान्सले बमवर्षकहरूलाई “अत्यधिक सावधानी” अपनाउँदै हटाइएको बताएका छन् । उनले इरानमाथि लामो समयदेखि अमेरिकाविरुद्ध आतंकवादी गतिविधि सञ्चालन गर्दै आएको आरोपसमेत लगाए ।

तर अमेरिकी विदेशमन्त्री मार्को रुबियोले विमान सारिएको विषयलाई कुनै एक घटनासँग प्रत्यक्ष रूपमा जोड्न अस्वीकार गरेका छन् । उनका अनुसार अमेरिकी सैन्य विमान र उपकरणलाई विश्वका विभिन्न स्थानमा नियमित रूपमा स्थानान्तरण गरिँदै आएको छ ।

बेलायती सरकारले भने आरएएफ फेयरफोर्ड सुरक्षित रहेको दाबी गर्दै आएको छ । इरानले पनि एयरबेससँग सम्बन्धित घटनामा आफ्नो संलग्नता रहेको आरोप अस्वीकार गरेको छ ।

ग्लुसेस्टरशायरस्थित आरएएफ फेयरफोर्ड अमेरिकी वायुसेनाको महत्वपूर्ण अग्रिम सञ्चालन केन्द्र मानिन्छ । पछिल्ला महिनामा अमेरिकाले यही आधारबाट बी–१ र बी–५२ बमवर्षक विमानलाई मध्यपूर्वतर्फ परिचालन गर्दै आएको थियो ।

बेलायतले भने उक्त आधारलाई इरानविरुद्ध केवल रक्षात्मक प्रकृतिका कारबाहीका लागि प्रयोग गर्न अनुमति दिएको बताइएको छ ।

विशेषज्ञहरूका अनुसार बी–१ बमवर्षकहरू फिर्ता गरिएपछि अमेरिकाको इरानविरुद्ध तत्काल ठूलो परिमाणमा हवाई कारबाही सञ्चालन गर्ने क्षमता केही हदसम्म प्रभावित हुन सक्छ । यद्यपि, फेयरफोर्डको प्रयोगमा बेलायतले लगाएको सीमाका कारण अमेरिकी सैन्य विकल्प यसअघि नै केही सीमित रहेको विश्लेषण गरिएको छ ।