लक्ष्मी सनराइज बैंकको नाफा ९७ प्रतिशतले बढ्यो, पहिलो त्रैमासमै कमायो ६५ करोड बढी

काठमाडौं । लक्ष्मी सनराइज बैंक लिमिटेडले चालु आर्थिक वर्ष २०८३/८४ को पहिलो त्रैमासमा उल्लेख्य नाफा वृद्धि गरेको छ। बैंकले सार्वजनिक गरेको अपरिष्कृत वित्तीय विवरणअनुसार समीक्षा अवधिमा बैंकको खुद नाफा ९६.६ प्रतिशतले वृद्धि भएको हो।

बैंकले चालु आर्थिक वर्षको पहिलो त्रैमासमा ६५ करोड ३३ लाख रुपैयाँ खुद नाफा आर्जन गरेको छ। गत आर्थिक वर्षको सोही अवधिमा बैंकले ३३ करोड २३ लाख रुपैयाँ खुद नाफा कमाएको थियो।

बैंकको नाफामा सुधार आउँदा प्रतिसेयर आम्दानी (ईपीएस) पनि बढेको छ। समीक्षा अवधिमा बैंकको ईपीएस ९ रुपैयाँ ७६ पैसा पुगेको छ। गत वर्षको सोही अवधिमा यस्तो आम्दानी ५ रुपैयाँ ४६ पैसा रहेको थियो।

बैंकको खुद ब्याज आम्दानी भने समीक्षा अवधिमा २ अर्ब ७६ करोड रुपैयाँ पुगेको छ। गत वर्षको सोही अवधिमा यस्तो आम्दानी २ अर्ब ७१ करोड रुपैयाँ रहेको थियो।

त्यस्तै, बैंकको खुद शुल्क तथा कमिसन आम्दानी ७ करोड २३ लाख रुपैयाँ पुगेको छ। बैंकको कुल सञ्चालन आम्दानी ३ अर्ब ३८ करोड रुपैयाँ रहेको छ।

वित्तीय विवरणअनुसार बैंकको कुल निक्षेप ४ खर्ब ४२ अर्ब ४० करोड रुपैयाँ पुगेको छ भने कर्जा तथा सापटी ३ खर्ब २७ अर्ब १९ करोड रुपैयाँ रहेको छ। बैंकको कुल सम्पत्ति ५ खर्ब ३८ अर्ब २८ करोड रुपैयाँ पुगेको छ।

यद्यपि, बैंकको खराब कर्जा अनुपातमा भने दबाब देखिएको छ। समीक्षा अवधिमा बैंकको निष्क्रिय कर्जा (एनपीएल) अनुपात ५.५८ प्रतिशत पुगेको छ। गत आर्थिक वर्षको सोही अवधिमा यस्तो अनुपात ५.४२ प्रतिशत रहेको थियो।

बैंकको प्रतिसेयर नेटवर्थ १७८ रुपैयाँ रहेको छ भने मूल्य आम्दानी अनुपात २७.८९ गुणा रहेको छ।

बैंकको चुक्ता पुँजी २६ अर्ब ७८ करोड रुपैयाँ रहेको छ। समीक्षा अवधिमा बैंकको सञ्चित नाफा तथा अन्य वित्तीय सूचकमा समेत सुधार देखिएको छ।

सो अवधिसम्म बैंकको वितरणयोग्य मुनाफा १ अर्ब ४२ करोड ७० लाख रुपैयाँ पुगेको छ । यसर्थमा बैंकको सो अवधिसम्मको लाभांश क्षमता प्रतिसेयर ५.३३ प्रतिशत रहेको छ ।