नेपाल पुनर्बीमा कम्पनीको सीईओका लागि ५ जना सर्टलिस्टेड, को–को परे ?

INSURANCE
मंगलवार, जेष्ठ ८,२०८१ 10:50:12

काठमाण्डौ । नेपाल पुनर्बीमा कम्पनीको प्रमुख कार्यकारी अधिकृत(सीईओ)पदका लागि ५ जना उम्मेदवार सर्टलिस्टमा परेका छन् । कम्पनीको सीईओ छनौट तथा सिफारिस समितिले ५ जना उम्मेदवारको नाम सर्टलिस्ट गरेको हो ।

सीईओ पदका लागि दरखास्त आवेदन दिएका मध्येबाट दामोदर भण्डारी, नारायणकुमार भट्टराई, बुद्धकाजी श्रेष्ठ, श्रीमान कार्की र सुरेन्द्र थापा सर्टलिस्टमा परेका छन् । कम्पनीले गत फागुन ७ गते रिक्त रहेको सीईओ पदका लागि २१ दिने दरखास्त आह्वान गरेको थियो । दरखास्त आवेदन दिएका आवेदकमध्येबाट उम्मेदवारको शैक्षिक योग्यता, कार्य अनुभव र व्यवसायिक कार्ययोजनाको मूल्यांकनमा सबैभन्दा बढी अङ्क प्राप्त गर्ने ५ जना उम्मेदवारलाई व्यावसायिक कार्य योजनाको प्रस्तुतीकरण तथा अन्तरवार्ताका लागि छनौट गरिएको हो ।

सर्टलिस्टमा परेका ५ जना उम्मेदवारहरूका लागि कार्ययोजना प्रस्तुतीकरण र अन्तरवार्ताको स्थान र मिति समेत तोकिएको छ । उम्मेदवारहरुको प्रस्तुतीकरण र अन्तरवार्ता आगामी जेठ ११ गते काठमाण्डौको थापाथलीस्थित नेपाल पुनर्बीमा कम्पनीको कार्यालयमा हुनेछ । उम्मेदवारहरुलाई आफूले पेश गरेका सम्पूर्ण कागजातहरुको सक्कल प्रति साथमा लिई आउनु पर्नेछ र दरखास्त फाराम साथ पेश गरेको व्यावासयिक कार्ययोजना नै प्रस्तुतीकरण गर्नुपर्ने छ ।

५ जना उम्मेदवारहरुको कार्ययोजना प्रस्तुतीकरण र अन्तरवार्ताको मूल्यांकनको आधारमा एक जनालाई सीईओ नियुक्त गरिनेछ ।