तीन महिनामै डबल डिजीटको रिटर्न खोज्दै हुनुहुन्छ ? यो सेयर हुनसक्छ विकल्प

BANKING
बुधबार, श्रावण २३,२०८१ 19:11:26

काठमाण्डौ । जोखिमरहित ढंगले १५ प्रतिशत हाराहारीमा रिटर्न हुने कुनै सेयर वा लगानी उपकरणको खोजीमा हुनुहुन्छ ? त्यसो हो भने एउटा विकास बैंकको सेयरमा लगानी तपाईका लागि लाभदायक हुनसक्छ ।

आर्थिक वर्ष २०८०–८१ को चौथो त्रैमाससम्मको वित्तीय विवरण बैंक तथा वित्तीय संस्थाहरुले धमाधम प्रकाशन गरिरहेका छन् । यो क्रममा तीनवटा जिल्लामा कार्यक्षेत्र रहेको मितेरी डेभलपमेन्ट बैंकको सेयरमा लगानी गर्नु तपाईका लागि सही हुनसक्छ ।

कारण यो कम्पनीको दोश्रो बजारमा अन्तिम कारोबारमूल्य प्रतिकित्ता ६२० रुपैयाँ मात्र रहेको छ ।

प्रतिकूल समयका बाबजुद यो विकास बैंकले गत वर्षको तुलनामा आफ्नो लाभांश क्षमता बढाएको छ ।

२०८०–८१ को चौथो त्रैमाससम्ममा कम्पनीले १५ प्रतिशतसम्मको लाभांश बाँड्ने क्षमता बनाएको छ । अघिल्लो वर्ष यस्तो क्षमता १४ प्रतिशत हाराहारीमा थियो ।

कम्पनीले छिटोमा दशैंअघि र ढिलोमा तिहारअघिसम्म लाभांश घोषणा गरी एजीएमबाट पारित गरिसक्छ । यसरी हेर्दा अहिले गरिएको लगानीले मात्र ३ महिनामा १५ प्रतिशत हाराहारीमा रिटर्न प्राप्त गर्नसक्छ ।

सानो विकास बैंक र भविष्यमा अन्यत्र समेत व्यवसाय विस्तार गर्न खोजिरहेकोले लाभांशसम्बन्धी निर्णय गर्दा कम्पनीले बोनस सेयरमै विशेष फोकस गर्नसक्छ । यस्ता कम्पनीमा हुने तपाईको लगानीमा तुलनात्मक रुपमा कम जोखिम हुनसक्छ ।

पछिल्लो समय सेयर बजारमा नेगेटिभ इपीएस भएका र लाभांश बाँड्ने क्षमता नै नभएका कम्पनीको सेयरमूल्य समेत रकेटको गतिमा उडाइएको छ । कतिपय नेगेटिभ इपीएस भएका फाइनान्स कम्पनीको सेयरमूल्य समेत प्रतिकित्ता ७०० भन्दा बढी पुगिसकेको अवस्थामा प्रतिसेयर आम्दानी रु. १४.३६ कायम गरेको र १५ प्रतिशत लाभांश क्षमता बनाएको मितेरी डेभलपमेन्ट बैंकको सेयर दोश्रो बजारमा ६२० रुपैयाँमै पाउनु लगानीका लागि अवसर पनि बन्नसक्छ ।

वित्तीय अवस्था

चौथो त्रैमाससम्ममा यो बैंकले १५ करोड ९५ लाख खूद नाफा कमाएको छ । अघिल्लो वर्ष १६ करोड बढी थियो ।

अघिल्लो वर्ष २३ करोड ३२ लाख रहेको सञ्चालन मुनाफा बढेर २४ करोड ५९ लाखको उचाईमा पुगेको छ ।

कुल १ अर्ब ११ करोड चुक्तापूँजी रहेको यो कम्पनीले समीक्षा अवधिका लागि १६ करोड ६७ लाख बढी वितरणयोग्य मुनाफा आर्जन गरेको छ ।

यो एकवर्षको अवधिमा कम्पनीले खराब कर्जाको अनुपातलाई उल्लेख्य घटाउन सफल भएको देखिन्छ । अघिल्लो वर्षको यही समयसम्म १.२५ प्रतिशत रहेको खराब कर्जाको अनुपात घटेर समीक्षा अवधिमा ०.९७ प्रतिशतमा सीमित बन्न पुगेको छ । यसले समेत मितेरीलाई वितरणयोग्य मुनाफा बढाउन सहयोग पुगेको हो ।

समीक्षा अवधिमा मितेरी डेभलपमेन्ट बैंकको प्रतिसेयर नेटवर्थ १४४.५० रुपैयाँ, मूल्य आम्दानी अनुपात ३७.६१ गुणा, पूँजीकोष अनुपात ३७.७० प्रतिशत कायम भएको छ ।