इन्जिनमा समस्या आएपछि फोर्डले ९० हजार युनिट बढी कार फिर्ता मगाउने

काठमाण्डौ । अमेरिकाको दोस्रो ठूलो अटो कम्पनी फोर्डले ९० हजार बढी कार बजारबाट फिर्ता मगाउने भएको छ । कम्पनीले अमेरिकी बजारबाट ९० हजार ७३६ युनिट कार फिर्ता मगाउन लागेको हो ।

सवारीका बेला इन्जिन इनटेक भल्सहरुमा समस्या आउन सक्ने भएकाले बजारबाट फोर्डका कारहरु फिर्ता मगाउन लागिएको अमेरिकी नेशनल हाइवे ट्राफिक सेफ्टी एडमिनिस्ट्रेशनले जनाएको छ ।

यो निर्णयबाट फोर्डका २०२१–२०२२ को केही ब्रोन्को, एफ–१५० ऐज,एक्स्प्लोलर,लिंकन नौटिलस र लिंकन एभियटर भेरियन्ट प्रभावित हुनेछन् ।

यी कारहरुको इन्जिनलाई डिलरहरुले इन्जिन साइकल टेस्ट गर्नेछन् र आवश्यक परेमा इन्जिन समेत परिवर्तन गरिनेछ । यसका लागि कम्पनीले कुनै पनि शुल्क नलिने जनाइएको छ ।