श्रीलंकामा नवनिर्वाचित राष्ट्रपतिले गरे संसद विघटन, नोभेम्बरमा निर्वाचन हुने

काठमाण्डौ । श्रीलंकाका नवनिर्वाचित राष्ट्रपति अनुरा कुमारा दिसानायकेले संसद विघटन गरेका छन् । उनले संसदीय निर्वाचन गराउन संसद विघटन गरेका हुन् । नोभेम्बर १४ मा अब श्रीलंकामा संसदीय निर्वाचन हुने सरकारी राजपत्रमा उल्लेख छ ।

२२५ सिटमध्ये दिसानायकेको पार्टी नेशनल पिपुल्स पावर गठबन्धनले ३ सिट मात्रै पाएको छ । यसअघि दिसानायकेले हरिणी अमरसूर्यालाई देशको नयाँ प्रधानमन्त्री चयन गरेका थिए । श्रीलंकाको इतिहासमा महिला प्रधानमन्त्री बन्ने यो तेस्रो पटक हो ।

राष्ट्रपति निर्वाचनमा विजयी भएपछि दिसानायकेले संसदीय निर्वाचनका लागि छिट्टै संसद विघटन गर्ने बताएका थिए ।

उनले आफ्नो नीतिलाई कार्यान्वयन गर्न सकेसम्म चाँडो निर्वाचन हुने बताए । उनले यसअघि जनताको इच्छाविपरीत बनेको संसदलाई निरन्तरता दिनुको कुनै अर्थ नभएको बताए ।

यसअघि सन् २०२० को अगस्टमा श्रीलंकामा आम निर्वाचन भएको थियो।