बैंक तथा वित्तीय संस्थामा‘केवाईसी’ भर्नु पर्ने बाध्यताबाट छुटकारा

काठमाण्डौ । अब ग्राहकहरुले बैंक तथा वित्तीय संस्थामा गएर ग्राहक पहिचानसम्बन्धी विवरण (केवाईसी) भर्नु नपर्ने भएको छ । बैंक तथा वित्तीय संस्थाले ग्राहकले राष्ट्रिय परिचयपत्र बनाउँदा पेस गरेको विस्तृत विवरणलाई लिन सक्ने गरी सरकारले व्यवस्था गर्न लागेको हो । यस व्यवस्थाबाट हरेक वर्ष केवाईसी फारम भर्नुपर्ने बाध्यताबाट नागरिकले छुटकारा पाउने भएका छन् ।  

गत बिहीबार जारी भएको ‘सम्पत्ति शुद्धीकरण (मनी लाउन्डरिङ) निवारण नियमावली, २०८१’ मा केवाईसी) भर्नु नपर्ने व्यवस्था गर्न लागिएको हो ।

यस व्यवस्थासँगै बैंक तथा वित्तीय संस्था, बीमा कम्पनी, सहकारी, सेयर ब्रोकरलगायतले ग्राहकको अनुमति लिई केवाईसीसम्बन्धी जानकारी तथा विवरण अनलाइनबाटै प्राप्त गर्न सक्नेछन् ।  

तर यसका लागि व्यक्तिले नागरिकता र राष्ट्रिय परिचयपत्र बनाएको हुनुपर्ने छ र व्यक्तिगत जानकारी लिन बैंक तथा वित्तीय संस्थाले अनिवार्य रुपमा व्यक्तिको सहमति लिनु पर्नेछ ।  

यस्तो विवरण बैंक तथा वित्तीय संस्थाले पुनःग्राहकबाटै प्रमाणीकरण गराउनुपर्ने हुन्छ । थप जानकारीका लागि पनि ग्राहकको अनुमति लिनु पर्नेछ ।