उच्च मनोबलसहित पूँजीबजार सुधारको काम जारी राख्न सेबोन अध्यक्षलाई अर्थमन्त्रीको निर्देशन, उर्जा उत्पादकसँग छलफल

काठमाण्डौ । अर्थमन्त्री विष्णुप्रसाद पौडेलले नेपाल धितोपत्र बोर्ड(सेबोन)का अध्यक्ष सन्तोषनारायण श्रेष्ठलाई मनोबल उच्च राखेर पूँजीबजारमा थालेको सुदृढीकरण र शुद्धिकरणको अभियानलाई निरन्तर गर्न निर्देशन दिएका छन् ।  

आफ्नो विषयमा पछिल्लो समय केही उर्जा उत्पादकहरुले नियोजित रुपमा खेदो खनेपछि र मिडियाबाजी गरेपछि सो विषयमा आफैं ब्रिफिङ गर्न बुधबार १२ बजेतिर अर्थमन्त्रालय पुगेका सेबोन अध्यक्ष श्रेष्ठलाई अर्थमन्त्री पौडेलले पूँजीबजारको सुधारका लागि राम्रो काम भइरहेको भन्दै आरोपहरुकै कारण मनोबल कमजोर नपार्न र स्वच्छ मनले थालेका कामहरुलाई निरन्तरता दिन निर्देशन दिएका हुन् । 

अर्थमन्त्री पौडेलको निजी सचिवालयका एक सदस्यका अनुसार आफूले गल्ती नगरेता पनि आफूविरुद्ध अनावश्यक भ्रम फैलाइएको, सुनियोजित चरित्रहत्या गरिएको र केही उर्जा उत्पादकहरुले यस्तो गर्नु पछाडिको कारण लगायतका विषयमा ब्रिफिङ गर्न सेबोन अध्यक्ष आफैंले टाइम मागेका थिए । सो क्रममा श्रेष्ठले मन्त्रालयका सचिव, सहसचिवहरुसँग समेत भेट गरेका थिए ।  

‘जसले उर्जा उत्पादकको बर्बादी रोके, उनैमाथि धसियो 'छुरा' !’

अर्थमन्त्रीसँगको भेटमा उनले मिडियाबाजी भइरहेको विषयमा प्रष्ट पार्ने काम गरेका थिए । 'ममाथि नियोजित प्रहार भयो । मैले सेबोन अध्यक्ष भएर काम गर्ने क्रममा नैतिक पतन हुने कुनै गतिविधि गरेको छैन ।' श्रेष्ठको भनाई उद्धृत गर्दै स्रोतले भन्यो-'मेरो विषयमा कुनै शंका भए हजूरहरुले पनि छानबिन गर्नुहोला । मेरो गल्ती कतै भेटिए जुनसुकै बेला पद त्याग्न तयार छु । कारबाही भोग्य तयार छु ।'  

श्रेष्ठको ब्रिफिङ र उनलाई पेल्ने कारणहरुको विषय सरसर्ती सुनेपछि अर्थमन्त्री पौडेलले मिडियाबाजी गरेकै भरमा कुनै निर्दोष दोषी सावित नहुने विषय सम्झाएका थिए । ‘तपाईले राम्रो काम गरिरहनुभएको छ । तपाईको इमानदारिताप्रति हामीमा कुनै शंका छैन । मिडियाहरुमा आएका कुराहरुकै आधारमा हामीले धारणा परिवर्तन गर्ने वा निर्दोषलाई दोषी भन्ने हुँदैन । फेरि बजार सुधारको पवित्र अभियानमा अगाडि बढ्दा यस्ता अवरोधहरु आउनसक्छन्, पन्छाउँदै अगाडि बढ्नुपर्छ ।’ अर्थमन्त्रीको भनाई उद्धृत गर्दै सचिवालय सदस्यले भने–‘ढुक्क भएर काम गर्नुस् । जुन इथिक्सका साथ पूँजीबजारको सुदृढीकरण र शुद्धिकरणका कामहरु अगाडि बढाउनुभएको छ, निर्धक्क साथ अगाडि बढ्नुहोला ।’ 

केही उर्जा उत्पादकहरुले सामूहिक रुपमा आक्रोश पोखेका र सो क्रममा आधारहीन विषय ल्याएर चरित्रहत्या गरेका विषयलाई आफूले पनि नजिकबाट बुझेको उल्लेख गर्दै अर्थमन्त्री पौडेलले उनीहरुसँग छलफल गर्न र गुनासाहरु सुनिदिन समेत निर्देशन दिएका थिए ।  

अर्थमन्त्रीको सोही निर्देशनपछि सेबोन अध्यक्ष श्रेष्ठले आजै अपरान्ह ४ बजे उर्जा उत्पादकहरुलाई छलफलका लागि खुमलटारस्थित कार्यालय बोलाइसकेका जानकारी आएको अर्थस्थित स्रोतले जनाएको छ ।