सुनको मूल्यमा फेरि उछाल, भाउ बढेर ४१०० डलरमाथि

काठमाण्डौ । सुनको मूल्यमा पुनः उछाल आउने अवस्था देखिएको छ ।  

पछिल्लो केही घण्टामा सुनको मूल्यमा २ प्रतिशतको बढोत्तरीसहित ट्राय औंस(२८.३४९५ ग्राम)को मूल्य ४१३० डलरभन्दा माथि पुगेको हो।

केही दिनदेखि अन्तराष्ट्रिय बजारमा सुनको मूल्यमा तीव्र उतारचढाव देखिएको छ । पछिल्लो तीन दिनको अवधिमा सुनको मूल्य ९ प्रतिशतसम्मले घटेको थियो । पछिल्ला केही घण्टा चाहिँ घट्न बन्द भएर सुनको मूल्य सुधार हुँदै अहिले २ प्रतिशतले बढिसकेको छ ।  

हिजो पनि अन्तराष्ट्रिय बजारमा कारोबार खुलेलगत्तैदेखि सुन र चाँदीको मूल्य घटेको थियो । लामो समयसम्म झिनो अंकले मूल्य घट्यो । १२ घण्टाअघिसम्म  करिब ४००० प्रति औंसमा झरिसकेको सुनको मूल्य सम्हालिएर यो समाचार तयार पार्दासम्म ४१३० डलरभन्दा माथि पुगेको छ । 

चाँदीको मूल्यमा पनि करिब २ प्रतिशतकै बढोत्तरी देखिएको छ । योसँगै प्रति औंस चाँदीको मूल्य पनि ४९ डलरभन्दा माथि पुगेको छ ।  

सिएनएन मनी, बीबीसी विजिनेश, रोयटर्स, सिएनबिसी लगायतमा प्रकाशित प्रक्षेपणहरुमा समेत सुनको मूल्य अब धेरै नघट्ने दाबी गरिएको छ ।