अब रुसबाट १० दिनमै भारतमा आईपुग्नेछ सामान,पश्चिमा देशहरुको घेराबन्दीबाट बच्न पुटिनको यस्तो योजना

विश्व अर्थतन्त्र
सोमबार, चैत्र १२,२०८० 16:19:53

काठमाण्डौ । अब रुसबाट भारतमा केवल १० दिनमा सामान पुग्ने भएको छ । पश्चिमा देशहरुको आर्थिक नाकाबन्दीबाट थलिएको रुसले एउटा यस्तो रेलमार्ग बनाईरहेको जसमार्फ रुसबाट १० दिनमै भारतसम्म सामान आईपुग्नेछ ।

अहिले भने रुसबाट भारतमा सामान आउन ३० देखि ४५ दिनसम्म लाग्ने गरेको छ ।

कयौं शताब्दीदेखि युरोप रुसको प्रमुख व्यापारिक साझेदारका रुपमा रहँदै आएको थियो । तर युक्रेन युद्धबाट भने यसमा परिवर्तन आएको छ । युक्रेन युद्धपछि चीन र भारतसँग रुसको व्यापार कयौं गुणा वृद्धि भईसकेको छ ।

यहि कारण रुस अब एउटा यस्तो रेलमार्ग निर्माण गर्दैछ,जसबाट चीन र भारतमा उसको पहँच सहज हुनेछ । यो रेलमार्गले भविष्यमा स्वेज नहर हुने व्यापारलाई कडा टक्कर दिने दाबी समेत गरिएको छ ।

रुसले निर्माण गर्ने यो रेल मार्गमध्ये सबैभन्दा महत्वपूर्ण १६० किलोमिटरेको मार्ग रहेको छ । १.७ अर्ब डलरको यो रेल मार्ग निर्माणको काम यहि वर्ष देखि सुरु हुने विश्वास गरिएको छ । यसबाट रुस सिधै इरानको बन्दरगाहसँग जोडिने छ । जसबाट मुम्बर्इ सम्म रुसको पहँुच सहज हुनेछ । रुसले यो परियोजनाका लागि ईरानलाई १.४ अर्ब डलर ऋण दिने सहमति जनाएको छ ।

रुसले ईरानको रेलमार्गलाई धेरै नै महत्वको रुपमा हेरेको छ । यो मार्गलाई आयात निर्यातका लागि एकदमै महत्वपूर्ण मान्ने गरिन्छ । रुसका राष्ट्रपति भलादिमिर पुटिनले यो नयाँ मार्गबाट रुसको सेन्ट पीटर्सबर्गबाट मुम्बईसम्म सामान पुग्न १० दिन मात्रै लाग्ने बताएका छन् । यसले चीसँगको पहुँचमा पनि सजिलो हुने रुसी अधिकारीहरुले दाबी गरेका छन् ।

युक्रेन युद्धपश्चात चीनसँग रुसको व्यापार ६१ प्रतिशतले बढेर २४० अर्ब डलर पुगेको छ ।

यस्तै भारतसँग पनि रुसको व्यापार सन् २०२१ को तुलनामा ४ गुणाले बढेर ६५ अर्ब डलर पुगेको छ ।

नयाँ रेलमार्गले ईरानको दुई शहर अस्तारा र राश्तलाई जोड्नेछ । यसमार्फत ईरान उत्तरमा अजरबैजानसँग जोडिने छ र यसरी रुसी रेलवेको ग्रिडसम्म पहुँच विस्तार हुनेछ । यो रेलमार्ग सन् २०२८ सम्म पुरा हुने विश्वास गरिएको छ । यो रेलमार्गको पुरा लम्बाई ६ हजार ९२० किलोमिटर लामो हुनेछ । -एजेन्सी