अपडेट: रवि, बालेन र कुलमानबीच आगामी निर्वाचनमा सँगै जाने सहमति

काठमाण्डौ । राष्ट्रिय स्वतन्त्र पार्टी (रास्वपा) का सभापति रवि लामिछाने, काठमाडौं महानगरपालिकाका मेयर बालेन्द्र शाह (बालेन) र उज्यालो नेपाल पार्टीका संरक्षक कुलमान घिसिङबीच आगामी प्रतिनिधिसभा निर्वाचनमा सँगै जाने गरी सहमति भएको छ ।

जेन्जी आन्दोलनका अगुवा सुदन गुरुङले यो सहमतिमा निर्णायक भूमिका खेलेका छन् । नेपालखबरसँग कुरा गर्दै गुरुङले भने, ‘मैले कुलमानजी, बालेनजी र रविजीलाई मिलाएरै छाडेँ । तीनै जनालाई एक ठाउँमा ल्याउन पाउँदा निकै खुशी लागेको छ ।’

सुदन गुरुङका अनुसार यो सहमतिले वैकल्पिक राजनीतिक शक्तिहरूको बृहत् एकताको ढोका खोलेको छ । उनले चाँडै नै रवि लामिछाने, बालेन्द्र शाह र कुलमान घिसिङले संयुक्त रूपमा सम्झौतापत्र सार्वजनिक गर्ने जानकारी दिए ।

यसअघि शक्ति बाँडफाँटमा केही मतभेद देखिए पनि अन्तिम समयमा सम्मानजनक सहभागिताको आधारमा सहमति जुटेको स्रोतहरूको भनाइ छ । यो सहमतिले पुराना दलहरूलाई चुनौती दिने नयाँ वैकल्पिक ध्रुवको निर्माण गर्ने अपेक्षा गरिएको छ ।

निर्वाचन आयोगमा समानुपातिक बन्दसूची बुझाउने समयसीमा सकिन लाग्दा यो सहमतिले राजनीतिक वृत्तमा नयाँ तरंग ल्याएको छ । सहमतिपत्रको पूर्ण विवरण चाँडै सार्वजनिक हुने बताइएको छ ।