जेनजी आन्दोलनका कारण निर्जीवन बीमकहरुको नाफा प्रभावित, ५ कम्पनीले व्यहोरे रु.६०.६९ करोड घाटा

काठमाण्डौ । निर्जीवन बीमा कम्पनीहरु घाटामा देखिएका छन् । चालु आवको दोस्रो त्रैमाससम्म निर्जीवन बीमा कम्पनीहहरु समग्रमा ४१ लाख १५ हजार रुपैयाँ घाटामा देखिएका छन् ।  

गत आवको सोही अवधिसम्म निर्जीवन बीमा कम्पनीहरुले समग्रमा १ अर्ब ३५ करोड ८६ लाख रुपैयाँ नाफा कमाएका थिए ।  

सो अवधिसम्म ९ कम्पनी नाफामा छन् भने ५ कम्पनीले ठूलो घाटा ब्यहोरेका कारण समग्रमा निर्जीवन बीमकहरु घाटामा देखिएका हुन् । नाफामै रहेका कम्पनीहरुको पनि गत आवको दोस्रो त्रैमासको तुलनामा नाफा ह्वात्तै घटेको छ ।  

जेनजी आन्दोलनपश्चात् निर्जीवन बीमा कम्पनीहरुमा परेको ठूलो बीमा दाबीले बीमकहरुको नाफा प्रभावित बन्न पुगेको छ । नेपाल बीमा प्राधिकरणका अनुसार जेनजी आन्दोलनका कारण बीमा कम्पनीहरुमा अर्बौ रकम बीमा दाबी परेको छ । सोमध्ये बीमकहरुले केही प्रतिशत मात्रै भु्क्तानी दिएका छन् भने अधिकांश रकम भुक्तानी हुनै बाँकी छ ।  

यसरी बीमा कम्पनीहरुमा ठूलो दायित्व सिर्जना भएका कारण बीमकहरुले आफ्नो कोषमा भएको रकमसमेत दाबी भुक्तानीमा खर्चेको देखिन्छ ।  

सो अवधिसम्म सबैभन्दा बढी नाफा कमाउनेमा राष्ट्रिय बीमा कम्पनी रहेको छ । कम्पनीले १७ करोड ७२ लाख रुपैयाँ नाफा कमाएको छ । तर कम्पनीको यो नाफा गत आवको सोही अवधिसम्मको तुलनामा ६०.३४ प्रतिशत कम हो ।  

त्यस्तै, ओरियन्टल इन्स्योरेन्सले १६ करोड २२ लाख, प्रभु इन्स्योरेन्सले १२ करोड २४ लाख, नेशनल इन्स्योरेन्सले ६ करोड १० लाख, सगरमाथा लुम्बिनी इन्स्योरेन्सले ३ करोड ७३ लाख, हिमालयन एभरेष्टले १ करोड ५७ लाख, एनएलजीले १ करोड १० लाख, नेको इन्स्योरेन्सले १ करोड ७ लाख र नेपाल इन्स्योरेन्सले ४९ लाख रुपैयाँ मात्रै नाफा कमाएको छ ।  

सो अवधिसम्म ५ कम्पनीले भने ठूलो घाटा ब्यहोरेको छ । जसमा सबैभन्दा बढी आइजीआई प्रुुडेन्सियलले १८ करोड ११ लाख रुपैयाँ घाटा ब्यहोरेको छ ।

त्यस्तै, सिद्धार्थ प्रिमियरले १७ करोड ८५ लाख, युनाइटेड अजोडले १० करोड ६६ लाख, सानिमा जिआइसीले ९ करोड ५९ लाख र शिखर इन्स्योरेन्सले ४ करोड ४७ लाख रुपैयाँ घाटा ब्यहोरेको छ ।  

यसरी सो अवधिसम्म ५ कम्पनीले मात्रै ६० करोड ६९ लाख रुपैयाँ भन्दा बढी घाटा ब्यहोरेका छन् । नाफामा रहेका ९ कम्पनीमध्ये पनि प्रभु इन्स्योरेन्स बाहेक सबैको नाफा गत आवको तुलनामा ह्वात्तै घटेको छ ।