बैंकिङ कसुर मुद्दामा रुपन्देही–३ का उम्मेदवार पक्राउ

काठमाण्डौ । बैंकिङ कसुर सम्बन्धी मुद्दामा रुपन्देही–३ का स्वतन्त्र उम्मेदवार महेन्द्र यादवलाई प्रहरीले बुधबार साँझ पक्राउ गरेको छ।

जिल्ला प्रहरी कार्यालय रुपन्देहीका प्रवक्ता डीएसपी कृष्णकुमार चन्दका अनुसार जिल्ला अदालतको आदेशअनुसार यादवलाई सिद्धार्थनगर–६ स्थित गल्लामण्डी क्षेत्रबाट नियन्त्रणमा लिइएको हो।

अदालतले २०८१ फागुन २५ मा गरेको फैसलामा यादवलाई ३० लाख रुपैयाँ सावाँ तथा सोही बराबरको बिगो जरिवाना ठहर गरेको थियो। सोही बिगो रकमसँग सम्बन्धित कैद तथा जरिवाना कार्यान्वयनका लागि प्रतिवादीलाई अदालतमा उपस्थित गराउन आदेश जारी भएपछि प्रहरीले उनलाई पक्राउ गरेको जनाएको छ।

सिद्धार्थनगर–७, जनकपथ निवासी यादव यसअघि विभिन्न राजनीतिक दलबाट निर्वाचनमा उम्मेदवार बनेका थिए। यसपटक भने उनी रुपन्देही–३ बाट स्वतन्त्र उम्मेदवारका रूपमा चुनावी प्रचारप्रसारमा सक्रिय रहेका थिए।