चैत १२ मा सांसद शपथ, १३ मा प्रधानमन्त्री: सरकार गठनको काउन्टडाउन सुरु

काठमाण्डौ । प्रतिनिधिसभा निर्वाचनको अन्तिम परिणाम सार्वजनिक भएसँगै राष्ट्रिय स्वतन्त्र पार्टी (रास्वपा) ले नयाँ सरकार गठनको प्रक्रिया तीव्र बनाएको छ । बहुमतसहित सशक्त रूपमा उदाएको रास्वपाले चैत १३ गते नयाँ प्रधानमन्त्रीको शपथ गराउनेगरी तयारी अघि बढाएको हो ।

फागुन २१ गते सम्पन्न प्रतिनिधिसभा निर्वाचनमा रास्वपाले १८२ सिट जित्दै स्पष्ट बहुमत हासिल गरेको छ । यसअघि नै पार्टीले वरिष्ठ नेता बालेन्द्र (बालेन) शाहलाई प्रधानमन्त्रीको उम्मेदवार घोषणा गरिसकेको थियो । सोही निर्णयअनुसार शाहकै नेतृत्वमा सरकार गठन गर्ने तयारी अन्तिम चरणमा पुगेको छ ।

राजधानीस्थित रोयल सिंगी होटलमा बसेको शीर्ष नेताहरूको बैठकले सांसदहरूको शपथपछि तत्कालै प्रधानमन्त्रीको शपथ गराउने निष्कर्ष निकालेको छ । एक शीर्ष नेताका अनुसार चैत १३ गते नै प्रधानमन्त्रीको शपथ कार्यक्रम तय गरिएको छ, यद्यपि अन्य संवैधानिक निकायसँग समन्वय गरेर औपचारिक टुंगो लगाइनेछ ।

संघीय संसद् सचिवालयले चैत १२ गते दिउँसो २ बजे सांसदहरूको शपथग्रहण कार्यक्रम तय गरिसकेको छ । उक्त कार्यक्रम सकिएलगत्तै भोलिपल्ट प्रधानमन्त्री नियुक्ति तथा शपथको प्रक्रिया अघि बढाइनेछ । रास्वपाले सोही दिन मन्त्रिपरिषद् गठन गर्ने तयारीसमेत गरेको जनाइएको छ, तर मन्त्रीहरूको संख्या र नामावली भने अझै टुंगो लागेको छैन ।

रास्वपाका नेताहरूका अनुसार नयाँ सरकार गठनसँगै प्रशासनिक र नीतिगत प्राथमिकताहरू छिट्टै सार्वजनिक गर्ने तयारी पनि भइरहेको छ । दुईतिहाइ नजिकको जनादेश पाएको पार्टीले एकल सरकार गठन गर्दै स्थिर सरकार दिने दाबी गरेको छ ।

यसैबीच, संघीय संसद्को अधिवेशन चैत १६ गतेबाट आह्वान गर्ने तयारीसमेत अघि बढाइएको छ । सर्वदलीय बैठकमार्फत संसद् सचिवालयले यसबारे दलहरूलाई जानकारी गराइसकेको छ ।