इरानमाथि आज हमला गर्ने तयारी थियो तर खाडीका देशहरुको आग्रहमा रोके : ट्रम्प

काठमाण्डौ । अमेरिकी राष्ट्रपति डोनाल्ड ट्रम्पले इरानमाथि मंगलवारका लागि तय गरिएको सम्भावित सैन्य हमला तत्कालका लागि स्थगित गरिएको बताएका छन्। उनले मध्यपूर्वका प्रमुख नेताहरूको आग्रहपछि यो निर्णय गरिएको जानकारी दिएका हुन्।

ट्रम्पले आफ्नो सामाजिक सञ्जाल प्लेटफर्म ट्रुथ सोसलमा लेख्दै कतारका अमिर तमिम बिम हमाद अल थामी, साउदी अरबका युवराज मोहमद बिन सलमान तथा संयुक्त अरब इमिरेट्सका राष्ट्रपति मोहमद बिन जायेद अल नायनले इरानविरुद्धको आक्रमण रोक्न आग्रह गरेको बताएका छन्।

ट्रम्पका अनुसार ती नेताहरूले अहिले गम्भीर कूटनीतिक वार्ता जारी रहेकाले सैन्य कारबाहीले क्षेत्रीय तनाव झन् बढ्न सक्ने चिन्ता व्यक्त गरेका थिए। उनले सम्भावित सम्झौतामार्फत इरानलाई परमाणु हतियार विकासबाट रोक्ने विषय सबैभन्दा महत्वपूर्ण रहेको उल्लेख गरेका छन्।

ट्रम्पले रक्षा मन्त्री पेगे हेगसेट, ज्वाइन्ट चिफ्स अफ स्टाफका अध्यक्ष ड्यानियल केइन तथा अमेरिकी सेनालाई तत्काल हमला नगर्न निर्देशन दिएको बताए। साथै उनले कुनै स्वीकार्य सम्झौता नभए ठूलो स्तरको सैन्य कारबाहीका लागि तयार रहन पनि आदेश दिएको जनाएका छन्।

यसैबीच, इरानसँगको सम्भावित युद्धप्रति अमेरिकी जनमत सकारात्मक नरहेको विभिन्न सर्वेक्षणहरूले देखाएका छन्। हालै सार्वजनिक एक सर्वेक्षणअनुसार अधिकांश अमेरिकी मतदाताले इरानसँग युद्धमा जानु गलत निर्णय हुने बताएका छन्। विश्लेषकहरूका अनुसार यसले आगामी मध्यावधि निर्वाचनमा रिपब्लिकन पार्टीलाई राजनीतिक दबाब बढाउन सक्छ।