जीवन बीमकले प्रवाह गरे रु.१ खर्बको बीमालेख धितो कर्जा, ब्याज आम्दानी रु.७.६६ अर्ब

काठमाण्डौ । जीवन बीमा कम्पनीहरुले एक खर्ब रुपैयाँ बराबरको बीमालेख धितो कर्जा प्रवाह गरेका छन् । चालु आवको तेस्रो त्रैमाससम्म १४ जीवन बीमकले १ खर्ब ७ करोड रुपैयाँ बराबरको कर्जा प्रवाह गरेका हुन् ।  

यो कर्जा रकम गत आवको सोही अवधिसम्मको तुलनामा जम्मा २.३४ प्रतिशत मात्रै बढी हो । गत आवको तेस्रो त्रैमाससम्म जीवन बीमकहरुले ९७ अर्ब ७८ करोड रुपैयाँ बराबरको बीमालेख धितोकर्जा प्रवाह गरेका थिए ।  

बीमकहरुबाट प्रवाह हुने यस्तो कर्जामा सामान्य वृद्धि भएसँगै ब्याज आम्दानी समेत सामान्य बढ्न पुगेको छ । चैत मसान्तसम्म जीवन बीमकहरुले बीमालेख धितोकर्जा प्रवाह गरी ७ अर्ब ६६ करोड ९३ लाख रुपैयाँ ब्याज आम्दानी गरेका छन् ।

यो आम्दानी गत आवको सोही अवधिसम्मको तुलनामा १.३६ प्रतिशत बढी हो । गत आवको तेस्रो त्रैमाससम्म जीवन बीमकहरुले ७ अर्ब ५६ करोड ६३ लाख रुपैयाँ ब्याज आम्दानी गरेका थिए ।  

जीवन बीमा कम्पनीहरुमा बीमितले आफ्नो बीमालेख धितो राखी कर्जा लिन सकिने व्यवस्था छ । बीमा कम्पनीहरुले बैंक तथा वित्तीय संस्थाले लिने ब्याजदर भन्दा सहुलियतमा आफ्नो बीमितलाई कर्जा प्रवाह गर्नुपर्ने प्रावधान छ ।  

जीवन बीमालेखसम्बन्धी निर्देशिका, २०७८ मा ‘बीमकले बीमालेखअन्तर्गत पुरा ३ वर्षको बीमाशुल्क प्राप्त भई बीमा प्रारम्भ मितिबाट ३ वर्ष पुरा भएपश्चात् तथा एकल बीमाशुल्क भुक्तानी गर्ने बीमालेखको हकमा समेत बीमा प्रारम्भ मितिबाट ३ वर्ष पुरा भएपश्चात् बीमालेख समर्पण गर्न तथा धितो राखेर ऋण प्रदान गर्न सक्नेछ’ भनी उल्लेख छ ।  

बीमालेखबाहेक अन्य कुनै पनि वस्तु धितो राख्नु नपर्ने भएकाले बैंकको तुलनामा बीमा कम्पनीबाट ऋण लिने प्रक्रिया झन्झटमुक्त मानिन्छ । निर्देशिका बमोजिम बीमितले बीमा प्रारम्भ भएको तीन किस्ता प्रिमियम तिरेपछि प्रिमियम रकमको ९० प्रतिशतसम्म कर्जा लिन पाउनेछन् ।  

पछिल्लो समय बैंकहरुमा लगानीयोग्य रकम थुप्रिएको अवस्था छ । बैंकहरुबाट पर्याप्त कर्जा प्रवाह हुन सकेको छैन । यस्तो अवस्थामा बीमा कम्पनीहरुबाट भने धमाधम बीमालेख कर्जा प्रवाह भइरहेको तथ्याङ्कले देखाएको छ ।  

सो अवधिसम्म सबैभन्दा बढी नेपाल लाइफ इन्स्योरेन्सले ३६ अर्ब ८६ लाख रुपैयाँ बराबरको बीमालेख धितो कर्जा प्रवाह गरेको छ । तर कम्पनीको यो कर्जा प्रवाह गत आवको तुलनामा ०.५९ प्रतिशत कम हो ।  

गत आवको तुलनामा सबैभन्दा बढी यस्तो कर्जा उल्लेख्य बढाउनेमा आइएमई लाइफ रहेको छ । कम्पनीको कर्जा प्रवाह ३५.५१ प्रतिशतले वृद्धि भएको छ । यस्तो कर्जा प्रवाह मेट लाइफ, राष्ट्रिय जीवन बीमा कम्पनी, एलआइसी नेपाल र नेपाल लाइफको घटेको छ भने बाँकी सबै कम्पनीको बढेको छ ।  

ब्याज आम्दानी कुनको कति ?