अमेरिका–इरान युद्धमा पाकिस्ताको मध्यस्थतामाथि उठ्यो प्रश्न

काठमाण्डौ । अमेरिकी सिनेटर लिन्डसे ग्राहमले अमेरिका र इरानबीचको युद्धमा पाकिस्तानले मध्यस्थ बन्न खोज्नु समस्याजनक भएको बताएका छन्।

उनी अमेरिकी राष्ट्रपति डोनाल्ड ट्रम्पको रिपब्लिकन पार्टीका सिनेटर हुन्।

मंगलबार सामाजिक सञ्जाल प्लेटफर्म एक्समा लेख्दै ग्राहमले भने, ‘धेरै समयदेखि स्पष्ट देखिँदै आएको छ कि पाकिस्तानको मध्यस्थकर्ताको भूमिका कठिन र समस्याजनक छ। इजरायलप्रतिको उनीहरूको विरोध धेरै पुरानो हो।’

उनले थप लेखेका छन् ‘इरानका सैन्य जहाजहरू पाकिस्तानका एयर बेसमा राखिएको भन्ने कुरा पनि स्पष्ट छ, र पाकिस्तानका शीर्ष नेताहरूले इजरायलविरुद्ध विगतदेखि गर्दै आएको बयानबाजी चिन्ताजनक छ।’

ग्राहमले पाकिस्तानका रक्षा मन्त्री खवाजा असिफको एक पुरानो भिडियो उल्लेख गर्दै लेखेका छन् ‘रक्षा मन्त्रीले अब्राहम सम्झौताबारे भनेका थिए कि पाकिस्तान कहिल्यै यसमा सहभागी हुने छैन, किनकि उनीहरूलाई इजरायलमाथि विश्वास छैन। यो भिडियो एक वर्ष पुरानो भए पनि मलाई लाग्छ, अहिले पनि उनीहरूको सोच यही छ।’

उनले अगाडि लेखेका छन् ‘त्यसैले पाकिस्तानले अब राष्ट्रपति ट्रम्पको अपिलको जवाफ दिनुपर्छ कि उनीहरू अब्राहम सम्झौतामा सहभागी हुन्छन् वा हुँदैनन्।’