१०४१% ले बढ्यो हिमालयन बैंकको नाफा, कस्तो छ समग्र वित्तीय अवस्था ?

काठमाण्डौ । हिमालयन बैंक लिमिटेडले गत आवको चौथो त्रैमाससम्ममा १ अर्ब ४८ करोड रुपैयाँबराबरको खुद नाफा आर्जन गरेको छ । यो रकम अघिल्लो आवको तुलनामा १०४१.१६ प्रतिशतले बढी हो । बैंकले अघिल्लो आवको सोही अवधिसम्म १२ करोड ९७ लाख रुपैयाँ खुद नाफा कमाएको थियो ।  

बैंकको खुद ब्याज आम्दानी भने घटेको छ । अघिल्लो आवको चौथो त्रैमाससम्ममा १० अर्ब ४५ करोड रुपैयाँ रहेको बैंकको खुद ब्याज आम्दानी घटेर ८ अर्ब ८१ करोड रुपैयाँमा सीमित बनेको छ । बैंकको खुद शुल्क तथा कमिशन आम्दानी पनि १ अर्ब १५ करोडबाट घटेर १ अर्ब ६ करोडमा सीमित बनेको छ । बैंकको खुद सञ्चालन आम्दानी ८ अर्ब २६ करोड र सञ्चालन मुनाफा २ अर्ब ६२ करोड रहेको छ ।

Sponsored

चौथो त्रैमाससम्म बैंकको रिटेन्ड अर्निङ ९ अर्ब ८४ करोड रुपैयाँले ऋणात्मक रहेको छ भने रिजर्भको आकार २६ अर्ब ८० करोड रुपैयाँ धनात्मक रहेको छ ।  

बैंकको निक्षेप संकलन बढेको छ भने कर्जा प्रवाह घटेको छ । बैंकको निक्षेप संकलन ३ खर्ब ९ अर्बबाट बढेर ३ खर्ब ५१ अर्ब पुगेको छ। यस्तै कर्जा प्रवाह भने २ खर्ब ३० अर्ब रुपैयाँबाट घटेर २ खर्ब २७ अर्ब रुपैयाँ पुगेको छ ।  

समीक्षा अवधिसम्म बैंकको खराब कर्जा अनुपात ७.९६ प्रतिशत रहेको छ । अघिल्लो आवमा इम्पेयरमेन्ट चार्जका लागि ३ अर्ब ७५ करोड रुपैयाँ छुट्टाएको बैंकले समीक्षा अवधिसम्म भने २ अर्ब ८९ करोड रुपैयाँ छुट्टाएको छ ।  

चौथो त्रैमाससम्ममा बैंकको वितरणयोग्य मुनाफा ९ अर्ब ८४ करोड रुपैयाँले ऋणात्मक रहेको छ । यस्तै बैंकको प्रतिसेयर आम्दानी (ईपीएस) ०.६० रुपैयाँबाट बढेर ६.५६ रुपैयाँ पुगेको छ । बैंकको प्रतिसेयर नेटवर्थ १७७.४८ रुपैयाँ, प्रतिसेयर कुल सम्पत्तिको मूल्य १८५१.०४ रुपैयाँ र तरलता अनुपात ३५.३२ प्रतिशत कायम भएको छ ।