एप्पललाई उछिन्दै एनभिडीया बन्यो अमेरिकाको दोस्रो ठूलो कम्पनी, बजार पूँजीकरण ३ ट्रिलियन डलर बढी

काठमाण्डौ । वालस्ट्रिटको चर्चित एआई चिप निर्माता कम्पनी एनभिडीया, अमेरिकी सेयर बजार सूचीकृत दोस्रो ठूलो कम्पनी बनेको छ । कम्पनीले आईफोन निर्माता कम्पनी एप्पललाई उछिन्दै यो उपलब्धि हासिल गरेको हो ।

एनभिडीयाको बजार पूँजीकरण ३.०१९ ट्रिलियन डलर पुगेको छ । जुन एप्पलको २.९९ ट्रिलियन डलरको तुलनामा केहि मात्रै बढी हो । यससँगै एनभिडीया ३ ट्रिलियन डलर बजार पूँजीकरण भएको तेस्रो अमेरिकी कम्पनी बन्न सफल भएको छ ।

सबैभन्दा धेरै बजार पूँजीकरण भएको कम्पनीको रुपमा भने माइक्रोसफ्ट रहेको छ । माइक्रोसफ्टको बजार पूँजीकरण ३.१५ ट्रिलियन डलरबराबर छ ।

बुधबार एनभिडीयाको सेयरमूल्य ५.२ प्रतिशतले वृद्धि भएको थियो । यससँगै कम्पनीको सेयरमूल्य प्रतिकित्ता १ हजार २२४.४ डलर पुगेको छ । यो दिन एप्पलको सेयरमूल्य भने ०.८ प्रतिशतले मात्रै वृद्धि भयो ।