.gif)
(2).jpg)
.png)
काठमाण्डौ । विगत ३ वर्षदेखि सेयरधनीहरुलाई बोनस नबाँडेको नेपाल लाइफ इन्स्योरेन्सले कर्मचारीहरुलाई बाँड्ने बोनस भने १२६.७१ प्रतिशतले बढाएको छ ।
कम्पनीले गत आर्थिक वर्षमा आफ्ना कर्मचारीहरुलाई २५ करोड १ लाख रुपैयाँ बोनस वितरण गरेको छ । अघिल्लो आर्थिक वर्षमा कम्पनीले कर्मचारीहरुलाई जम्मा ११ करोड ३ लाख रुपैयाँ मात्रै बोनस वितरण गरेको थियो ।
कम्पनीले आर्थिक वर्ष २०७७/७८ देखि सेयरधनीलाई बोनस बाँडेको छैन । उक्त आवमा कम्पनीले आफ्ना सेयरधनीलाई १५.७९ प्रतिशत नगद लाभांश मात्रै वितरण गरेको थियो । यसका साथै आव २०७८/७९ मा भने कम्पनीले कुनै खालको लाभांश बाँडेको थिएन ।
सो वर्षमा कम्पनीले एफपीओ र हकप्रद सेयर लिलामीमा प्राप्त प्रिमियम वापतको १ अर्ब २ करोड रुपैयाँ सरकारलाई राजश्व बुझाएको थियो । जसकारण कम्पनीले आव २०७८/७९ मा सेयरधनीहरुलाई कुनै खालको लाभांश बाँडेको थिएन ।
त्यस्तै, कम्पनीले गत आवको मुनाफाबाट भने आफ्ना सेयरधनीहरुलाई २१.०५ प्रतिशत नगद लाभांश मात्रै वितरण गरेको छ । विगत ३ वर्षयता कम्पनीले सेयरधनीलाई बोनस वितरण नगरी नगद मात्रै बाँड्दै आएको छ ।
सेयरधनीहरुलाई बोनस बाँड्न नसकेपनि कम्पनीले आफ्ना कर्मचारीलाई भने उत्कृष्ट बोनस वितरण गरेको छ । बोनससँँगै कम्पनीले कर्मचारी तलब, चाडपर्व भत्ता लगायत विभिन्न सुविधामा खर्चिने रकम भने बढाएको छ ।
कम्पनीले कर्मचारीको तलब समेत ९.१६ प्रतिशतले बढाएको छ । अघिल्लो आवमा ४४ करोड ६३ लाख रुपैयाँ तलब बाँडेको कम्पनीले गत आवमा भने ४८ करोड ७१ लाख रुपैयाँ तलब वितरण गरेको छ ।
यसका साथै चाडपर्व भत्ता पनि ३०.२५ प्रतिशतले बृद्धि भएको छ । कम्पनीले दशैं र तिहार जस्तो ठूलो पर्वमा कर्मचारीलाई बाड्ने भत्ता पनि बढाएको हो । गत आवमा कम्पनीले यस्तो शिर्षकमा ३ करोड ९९ लाख रुपैयाँ खर्च गरेको छ । अघिल्लो आवमा भने कम्पनीले ३ करोड ६ लाख रुपैयाँ मात्रै खर्च गरेको थियो ।
त्यस्तै, कम्पनीले गत आवमा सामाजिक सुरक्षा कोष शिर्षकमा २ करोड ८९ लाख, ग्रेज्युटी शिर्षकमा ८ करोड २८ लाख, विदा भत्ता शिर्षकमा ४ करोड २२ लाख, कर्मचारी तालिमका लागि १ करोड ४३ लाख र कर्मचारीको स्वास्थ्य उपचारका लागि १० हजार रुपयाँ खर्च गरेको छ ।
यसका साथै कर्मचारीहरुको स्वास्थ्य तथा दुर्घटना बीमा वापत १ करोड ४८ लाख रुपैयाँ र कर्मचारी उत्प्रेरणा तथा हौसलाको लागि १ करोड ६० लाख रुपैयाँ खर्च गरेको छ ।
यसरी कम्पनीले गत आवमा मात्रै कर्मचारी सुविधाका लागि कुल १ अर्ब ४ करोड रुपैयाँ खर्च गरेको छ । यो रकम अघिल्लो आवको तुलनामा २६.८५ प्रतिशतले कम हो । अघिल्लो आवमा कम्पनीले कर्मचारी सुविधाका लागि ८२ करोड रुपैयाँ मात्रै रकम खर्च गरेको थियो ।
.png)
.jpg)
प्रतिक्रिया
0 प्रतिक्रियाअहिलेसम्म कुनै प्रतिक्रिया छैन। पहिलो प्रतिक्रिया तपाईंको हुन सक्छ।