पाँच साता लगातार बढेको बजार आगामी साता कस्तो रहला ? यस्तो छ प्राविधिक विश्लेषण

काठमाण्डौ । यो साता सेयर बजारमा ५ दिन कारोबार भयो । पाँच कारोबारमा बजार ३ दिन बढ्यो भने २ दिन मात्रै घट्यो । अघिल्लो साता २ हजार ५६८.१३ को बिन्दुमा बन्द भएको बजार यो साता २ हजार ७५५.६२ को विन्दुमा बन्द भयो । यस हिसाबले यो साता सेयर बजारमा १८७.४९ अंकको बढोत्तरी आयो ।

अघिल्लो साता करिब १४३.८१ अंकले बजारमा बढोत्तरी आएको थियो । यो साता दोस्रो बजारमा ३ वर्ष पछिकै उच्च अर्थात ९६.३१ अर्बको कारोबार भएर नयाँ रेर्कड कायम भएको छ । यो भनेको २०७८ साल भदौ महिना पछिकै उच्च कारोबार हो । त्यो समयमा एकै सातामा ९७.५९ अर्बको कारोबार भएको थियो । यस हिसाबले यो साता पनि दोस्रो बजारमा नेप्से परिसूचक र कारोबार दुबैमा बढोत्तरी आएको छ । अघिल्लो साताको तुलनामा यो साता बजार बढ्दा  कारोबार पनि बढेको छ । यो साता बजार पूँजीकरण ४३.७२ खर्ब पुगेको छ । अघिल्लो साता बजार पूँजीकरण ४० खर्ब ७४ अर्ब रहेको थियो । यो साता बजारमा बढोत्तरी आँउदा लगानीकर्ताहरुको सम्पत्ति २ खर्ब ९८ अर्बले बढेको छ ।  

प्राविधिक पक्षः  

क्याण्डल स्टिकको आधारमा  

क्याण्डल स्टिकको आधारमा बजारलाई साप्ताहिक रुपमा हेर्दा बजार बुलिस नै रहेको छ । तर डेली बेसमा हेर्दा श्ुटिङ स्टार प्रकृतिको क्याण्डल बनेको छ । यस्तो क्याण्डल आगामी साता भ्यालिड बनेमा बजारले करेक्सन लिने छ । तर इन्भ्यालिड भएको खण्डमा बजारले पुनः माथिको यात्रा तय गर्न सक्छ । यो साता २७५५ विन्दुमा बन्द भएको बजार यदि आगामी साता २८ सय विन्दुभन्दा बढीमा कारोबार भएमा शुटिङ स्टार इन्भ्यालिड हुने छ । तर बजार २७ सय विन्दुभन्दा तल खसेमा भने यस्तो क्याण्डल भ्यालिड हुनेछ ।  

बोलिङ्गर ब्याण्ड, म्याक्डी र आरएसआई  

बोलिङ्गर ब्याण्डले बजारको उत्तारचढावलाई जानउँछ । यो साता पनि बजार बोलिङ्गरको अपर ब्याण्डमा चलेको छ । तर साताको अन्तिम केही कारोबारमा मूल्य रेखाले अपर ब्याण्डलाई छोडेको छ । यसले बजारमा बिस्तारै सेयर डिस्ट्रीब्युसन हुन थालेको देखिन्छ । म्याक्डीमा बुलिस क्रसओभर रहेता पनि हिस्टोग्राम छोटा–छोटा हुँदै गएका छन् । त्यसैगरि आरएसआईमा ९० को तहबाट केही करेक्सन आएको छ । मनी फ्लो इन्डेक्समा पनि ९५ को तहबाट बजार घटेर ८८ मा आएको छ । समग्रमा ३ वटै इन्डिकेटरबाट नियाल्दा बजारमा वियरिस डाइभर्जेन्स बनेको छ ।  

पिभट् प्वइन्ट  

पिभट विश्लेषणमार्फत सेयर तथा डेरिभेटिभको अधिकतम, न्यूनतम र अन्तिम मूल्यलाई आधार मानी यसको भविष्यमा हुने मूल्यको उतारचढाव निकालिन्छ ।  

बढेमा प्रतिरोध  

प्रतिरोध ३ –२८८२

प्रतिरोध २ –२८३६

प्रतिरोध १– २७७८

पिभट प्वइन्टः २७५३

घटेमा सपोर्ट  

सपोर्ट १– २७१५

सपोर्ट २– २६७०

सपोर्ट  ३ –२६९१

निष्कर्षः  अघिल्लो सातामा बजार करिब १४३ अंकले बढेको बजारमा यो साता करिब १८७ अंकले बढ्यो  । बजार बढ्दा कारोबार पनि बढ्दै गएको छ । यो साता कारोबारले उच्च रेकर्ड बनायो । प्राविधिक रुपमा बजारलाई इलिअट वेभबाट नियाल्दा माइनर डिग्री तेस्रो वेभ चल्दै गरेको देखिन्छ । यद्यपी आगामी साता तेस्रो वेभ सकेर चौंथो वेभको करेन्सन आउन पनि सक्छ । जसलाई यो. साता बनेका विभिन्न इन्डिकेटर तथा कारोबार र भोल्युमले पनि पुष्टि गरेको देखिन्छ । यसकारण यदि आगामी साता बजारमा करेक्सन आउँछ भने त्यसले बजार थप मजबुत नै हुनेछ । इलिअट वेभबाट हेर्दा आगामी साता २८ सय देखि ३००० विन्दु आसपासबाट तेस्रो वेभ सकिन सक्छ । बजारलाई विभिन्न इन्डिकेटर तथा डाउ थेउरीबाट नियाल्दा पनि बजार अप ट्रेन्डमा नै चलेको देखिन्छ । यद्यपी यो साता मनी फ्लो इन्डेक्स, आरएसआइ जस्ता इन्डेक्समा भने वियरिस डाइभर्जेन्स देखिन्छ ।  

यो साता सेयर बजार ऐतिहासिक बन्यो । करिव ३ वर्षदेखि १८ सय देखि २२ सय सम्म चलेको बजारले यस अघिका प्रतिरोध ब्रेक गरेर २७५५ विन्दुमा बन्द भयो । कारोबार तथा भोल्युम पनि ३ वर्षपछि कै उच्च रह्यो । यो सातासम्म लगातार बजार पाँच साता बजारमा बढोत्तरी आएको छ । पाँच सातामा बजार ७१५.६२ अंकले बढेको छ ।  

नोटः सेयर बजारमा लगानी जोखिमपूर्ण हुन्छ, यो विश्लेष्ण कारोबारका लागि सिफारिस भने होइन ।