बजार बुझेकाहरु दशैंपछि नेप्सेले लय समात्नेमा ढुक्क, मारवाडी समुदायले सेयर नकिन्नुको यस्तो कारण

काठमाण्डौं । सधैंको दशैंको विदाअघिका दिनहरुमा बजार प्राय बढ्ने नै गरेको देखिन्छ । अघिल्ला दशैंमा सेयर किनेर लगानीकर्ता घर जान्थे । अहिले पनि ब्रोकरहाउसमा लगानीकर्ताहरुले भनिरहेका हुन्छन्: सेयर किन्ने हो, टीका लगाएर पछि दक्षिणाको पैसामा थपथाप गरेर तिर्ने हो । तर लगानीकर्ताहरुले यसो भन्दै गर्दा दशैंको विदा हुनुभन्दा २ दिनअघिको सेयर बजार घटेर बन्द भयो ।  

ब्रोकरहाउसमा भेटिएका कतिपय लगानीकर्ताहरुले भने आजको बजारमा गिरावट आउनुमा असोज मसान्तको प्रभाव रहेको बताँउछन् । अर्थशास्त्री सूर्यनारायण पौडेल पनि यसमा सहमत छन् । पौडेल भन्छन्-'यो समय भनेको चाडपर्वको हो । असोजको सामान्य प्रभाव पनि हुनसक्छ । तर भोलिदेखि असोज मसान्तको प्रभाव पनि सकिन्छ ।  आजको बजारलाई घटेको भन्दा पनि बजार साइडवेजमा चलेको भन्न सकिन्छ ।' 

पछिल्लोपटक २४४० बाट फर्केको बजार त्यो भन्दा माथि रहुञ्जेल बजार साइडवेज नै हुने उनको भनाई छ ।  

प्राविधिक रुपमा आजको क्याण्डल रातो बनेता पनि अघिल्लो क्याण्डलभित्रै बनेको छ । त्यसैले बजार धेरै नकारात्मक नरहेको जानकार बताउँछन् ।  

यसरी नै गएको बजार पनि दीगो हुने पौडेलको पनि तर्क छ । 'बजार घट्दा भोलुम पनि घट्नु स्वभाबिक नै हो । किनकी बेच्नेले पनि घटाएर बेच्न चाहेनन् । दशैंपछि भने बजार अप ट्रेन्डमा जाने सम्भावना देखिन्छ ।'- उनले भने । 

आफूलाई अर्थशास्त्रको विद्यार्थी बताउने अर्जुन थापा पनि अहिले घटेको बजार दशैं पछाडि लयमा फर्किनेमा ढुक्क छन् । 'किनकी सेयर बजारप्रति अर्थमन्त्री पनि सकारात्मक छन् । उनी बोलेको बोल्यै छन् । अहिले ब्याज पनि सस्तो छ । यो समय भनेको सस्तो ब्याजको पैसाले लगानी गरेर बस्ने समय हो ।' उनले भने-'आज घट्नुमा भने अघिल्ला दिनहरुमा केही अंक बढेको कारण सामान्य नाफा बुक मात्रै हो ।'  

भिजन सेक्यूरिटिज(स्टक ब्रोकर नम्बर ३४)का सञ्चालक राजकुमार तिमिल्सिनाले भने-'सोह्रश्राद्ध रहुञ्जेल मारवाडी समूहले सेयर खरिद गर्दैनन् । उनीहरुले यसलाई पितृ पक्ष भन्दै नयाँ काम नगर्ने भएका कारण पनि सेयर बजारमा कारोबार र भोलुम पछिल्लो समय कम भएको छ ।'  

कुराकानीको क्रममा उनी पनि बजारले दशैंपछि भने गति लिनेमा ढुक्क देखिए ।