विश्वको शीर्ष १५ धनाढ्यको सूचीबाट बाहिरिए अम्बानी र अडाणी

काठमाण्डौ । भारतीय धनाढ्य मुकेश अम्बानी र गौतम अडाणी विश्वको शीर्ष १५ धनाढ्यको सूचीबाट बाहिरिएका छन् । विश्वको धनाढ्यको सूचीमा आएको ठूलो फेरबदलका कारण अम्बानी र अडाणी शीर्ष १५ को सूचीबाट बाहिरिएका हुन् ।  

विगत केही समयदेखि भारतीय सेयर बजारमा आएको गिरावटका कारण यी दुई धनाढ्यको सम्पत्तिमा व्यापक कमी आएको छ । बितेको एक महिनामा मुकेश अम्बानीको कम्पनी रिलायन्स इन्डस्ट्रिजको सेयरमूल्य ५ प्रतिशतले घटिसकेको छ । पछिल्लो २४ घण्टाको अवधिमा मुकेश अम्बानीको सम्पत्ति २.७२ अर्ब डलरले घटेको छ । यो गिरावटसँगै अम्बानीको सम्पत्ति ९८.८ अर्ब डलरमा सीमित बनेको छ ।  

हाल अम्बानी विश्वको १७ औं धनी व्यक्तिको रुपमा रहेका छन् ।  

यस्तै गौतम अडाणीको सम्पत्ति पनि २.०६ अर्ब डलरले घटेको छ । अडाणीको सम्पत्ति ९२.३ अर्ब डलरमा सीमित बनेको छ । उनी विश्वको १८ औं धनी व्यक्तिको रुपमा रहेका छन् ।  

बिल गेट्सबाहेक विश्वका अन्य शीर्ष १० धनाढ्यको सम्पत्तिमा पनि गिरावट आएको छ । यसबीचमा एलन मस्कको सम्पत्ति ४.३९ अर्ब डलरले घटेर २५८ अर्ब डलर पुगेको छ । जेफ बेजोसको सम्पत्ति पनि १.९४ अर्ब डलरले घटेर २१८ अर्ब डलरमा सीमित बनेको छ । मार्क जुकरबर्गको सम्पत्ति पनि २.२३ अर्ब डलरले घट्दै १९९ अर्ब डलरमा झरेको छ ।  

बिल गेट्सको सम्पत्तिमा भने ३७३ मिलियन डलरको बढोत्तरी आएको छ ।