रवि लामिछानेको सांसद पद स्वतः निलम्बन

काठमाण्डौ । राष्ट्रिय स्वतन्त्र पार्टी (रास्वपा)का सभापति तथा पुर्वगृहमन्त्री रवि लामिछानेको प्रतिनिधि सभा सांसद पद स्वतः निलम्बनमा परेको छ ।  

लामिछानेविरुद्ध आइतबार कास्की जिल्ला अदालतमा सम्पत्ति शुद्धीकरण कसुरमा मुद्दा दायर भएपछि सांसद पद स्वतः निलम्बनमा पर्ने भएको हो ।  

सम्पत्ति शुद्धीकरण ऐन २०६४ को दफा २७ अनुसार मुद्दा दायरपश्चात् निजको पद स्वतः निलम्बन हुने व्यवस्था छ । दफा २७ मा ‘प्रचलित कानुनबमोजिम स्थापित संगठित संस्थाको कुनै पदाधिकारी वा कर्मचारी वा कुनै राष्ट्र सेवक यस ऐनबमोजिम थुनामा रहेकोमा त्यसरी थुनामा रहेको अवधिभर र निज उपर दफा २२ बमोजिम मुद्दा दायर भएकोमा सो मुद्दाको किनारा नभएसम्म त्यस्तो कर्मचारी, पदाधिकारी वा राष्ट्र सेवक स्वतः लिम्बन भएको मानिनेछ’ भनि उल्लेख छ ।  

सम्पत्ति शुद्धीकरण ऐनबमोजिम लामिछानेको पद स्वतः निलम्बन हुने जिल्ला अदालत कास्कीले जनाएको छ । लामिछानेसँग सहकारी ठगी र सम्पत्ति शुद्धीकरणमा गरी कुल ३० करोड ७१ लाखभन्दा बढी बिगो दाबी भएको छ ।