हालसम्मकै धेरै बजेट ल्याउने योजनामा जापान, सेयर बजारमा हरियाली

काठमाण्डौ । जापान सरकारले हालसम्मकै धेरै बजेट ल्याउने भएको छ । आगामी अप्रिलदेखि सुरु हुने नयाँ आर्थिक वर्षका लागि जापान सरकारले ७३५ बिलियन डलरबराबरको बजेट ल्याउने तयारी गरेको हो ।  

बढ्दो सामाजिक सुरक्षा दायित्व र कर्जा भुक्तानी खर्च जस्ता कारणले जापानको बजेटको आकार रेकर्डतोड स्तर पुगेको जनाइएको छ । अर्थतन्त्रलाई उकास्न सरकारमाथि थप दबाब पार्दै जापानको केन्द्रीय बैंक दशक लामो पुनर्उत्थानको कार्यक्रमबाट पन्छिएसँगै जापान सरकारले ११५.५ ट्रिलियन येनबराबरको बजेटको मस्यौदा तयार पारेको छ ।यस्तै सरकारले आगामी वर्ष नयाँ बोन्ड निष्कासनमा समेत कटौती गर्ने योजना बनाएको छ । यसअघि ३५.४ ट्रिलियन येनबराबरको नयाँ बोन्ड जारी गर्ने भनिएकोमा अब आगामी आवमा २८.६ ट्रिलियन येन जारी गर्ने योजनामा जापान सरकार रहेको छ ।  

यससँगै विगत १७ वर्षमा जापानमा पहिलोपटक नयाँ बोन्ड निष्कासन ३० ट्रिलियन डलरभन्दा कम हुने भएको छ ।  

‘स्टक–स्टार्ट फिस्कल स्पेन्डिङ’ र दशक लामो सुधारका कार्यक्रमहरुले जापानलाई विश्वकै सर्वाधिक ऋण भएको औद्योगिक देशको रुपमा उभ्याएको छ । हाल जापानको ऋण वार्षिक आर्थिक उत्पादनको तुलनामा दोब्बर पुगेको छ । यस्तै जापानको केन्द्रीय बैंकको पुनर्उत्थान कार्यक्रमले समेत जापानको वित्तीय स्वास्थ्यमा दबाब परेको जनाइएको छ ।  

जापान सरकारले रेकर्डतोड बजेट ल्याउने खबर बाहिरिएसँगै आज जापानको सेयर बजारमा हरियाली छाएको छ । आज जापानको सेयर बजार मापक इनडेक्स,‘निक्की२२५’ ०.५३ प्रतिशत अर्थात २०५ अंकले बढेको छ । अटो निर्माता कम्पनी निसान र होन्डाको सेयरमूल्य क्रमशः ५.०९ र ४.१५ प्रतिशतले बढेको छ ।