अमेरिकाबाट १४ लाख बढी आप्रवासी निकालिदै, सूचीमा १३ सय ६५ जना नेपाली पनि परे

काठमाण्डौ । अमेरिकाबाट १४ लाख भन्दा बढी आप्रवासी निकालिने भएका छन् । अमेरिकाको इमिग्रेसन एण्ड कस्टम इनफोर्समेन्ट (आईसीई) ले सूची सार्वजनिक गर्दै तत्कालै १४ लाख ४५ हजार ५ सय ४९ जना अमेरिकाबाट उनीहरुको देश फर्काउने जनाएको हो । यो सूचीमा १३ सय ६५ जना नेपाली समेत परेका छन् ।  

डोनाल्ड ट्रम्पले राष्ट्रपतिको जिम्मेवारी सम्हालेसँगै गैरकानुनी आप्रवासीलाई घर फर्काउन थालिएको हो । ट्रम्पले राष्ट्रपतिको शपथ ग्रहण गरेलगत्तै आप्रवासीलाई स्वदेश फिर्ता पठाउने कार्यकारी आदेशमा हस्ताक्षर गरेका थिए ।  

आईसीईले सार्वजनिक गरेको सूचीअनुसार अमेरिकाबाट निष्कासित हुनेमा होन्डुरसका नागरिकको संख्या सर्वाधिक छ। अमेरिकाबाट होन्डुरसका २ लाख ६१ हजार ६ सय ५१ जना निष्कासित हुनेछन् ।  

त्यस्तै, ग्वाटेमालाका २ लाख ५३ हजार ४ सय १३, मेक्सिकोका २ लाख ५२ हजार ४४, एल साल्भाडोरका २ लाख ३ हजार ८ सय २२ जना, चीनका ३७ हजार ९ सय ८ र भारतका १७ हजार ९ सय ४० जना निष्कासित हुनेछन् ।

अमेरिकामा हाल १ करोड ११ लाख गैरकानूनी आप्रवासी बसोवास गरिरहेका छन् ।