सुनको मूल्यमा उछाल, हालसम्मकै उच्च नजिक

काठमाण्डौ । आज सुनको मूल्यमा उछाल आएको छ । सुनको मूल्य आज अन्तराष्ट्रिय बजारमा १.६० प्रतिशत अर्थात ४३.९५ डलरले बढेको छ ।  

यो वृद्धिसँगै सुनको मूल्य प्रतिऔंस २ हजार ७९७ डलर पुगेको छ । यो रकम हालसम्मकै उच्च भन्दा केही मात्रै कम हो । यसअघि गत अक्टोबरमा सुनको मूल्य प्रतिऔंस २ हजार ७८८ डलर पुगेको थियो ।  

अमेरिकी राष्ट्रपति डोनाल्ड ट्रम्पले दिएको उच्च भन्सार शुल्कको धम्किका कारण मागमा बढोत्तरी आउदा सुनको मूल्यमा वृद्धि देखिएको हो ।  

यस्तै अमेरिकी मुद्रास्फितीको प्रतिवेदनका आधारमा फेडरल रिजर्भले तय गर्ने नीतिको प्रतिक्षामा लगानीकर्ता रहेका छन् । लगानीकर्ताहरु यतिबेला ट्रम्प प्रशासनले अपनाउने नयाँ नीति तथा विदेशी नीतिका विषयमा चिन्तित देखिन्छन् ।  

यस्तै डलरको मूल्यमा आएको ०.२ प्रतिशतको गिरावटका कारण अन्य मुद्रा भएका लगानीकर्तालाई सुनको खरिद सस्तो पर्न गएको छ । यस्ता लगानीकर्ताले खरिद बढाएसँगै सुनको माग बढेको छ ।  

यस्तै आज चाँदीको मूल्य समेत बढेको छ । चाँदीको मूल्य आज ०.८० डलरले बढ्दै प्रतिऔंस ३१.५१ डलरमा कारोबार भईरहेको छ ।