मेरोमाइक्रोफाइनान्सको खुद नाफा २३.७०% ले बढ्यो, वितरणयोग्य मुनाफा र ईपीएस कति ?

काठमाण्डौ । मेरोमाइक्रोफाइनान्स लघुवित्त वित्तीय संस्था लिमिटेडले चालु आवको दोस्रो त्रैमाससम्म ७ करोड ९५ लाख रुपैयाँ खुद नाफा आर्जन गरेको छ । यो नाफा अघिल्लो आवको सोहि अवधिको तुलनामा २३.७० प्रतिशतले धेरै हो ।  

अघिल्लो आवको दोस्रो त्रैमाससम्म कम्पनीले ६ करोड ४३ लाख मात्रै खुद नाफा आर्जन गरेको थियो ।  

समीक्षा अवधिसम्म कम्पनीको खुद ब्याज आम्दानी पनि बढेको छ । कम्पनीको खुद ब्याज आम्दानी २७.७७ प्रतिशतले बढेर ५० करोड ६३ लाख रुपैयाँ पुगेको छ । अघिल्लो आवको दोस्रो त्रैमाससम्म ४० करोड ५४ लाख रुपैयाँ रहेको कम्पनीको खुद सञ्चालन आम्दानी बढेर ४६ करोड ९३ लाख रुपैयाँ पुगेको छ ।  

कम्पनीले कर्मचारीका लागि २५ करोड ७७ लाख र ७ करोड ३१ लाख रुपैयाँ अन्य सञ्चालन खर्च गरेको छ । कम्पनीले इम्पेयरमेन्ट चार्जका लागि ७ करोड ९७ लाख रुपैयाँ छुट्टाएको छ । अघिल्लो आवमा कम्पनीले इम्पेयरमेन्ट चार्जका लागि ५ करोड २ लाख रुपैयाँ छुट्टाएको थियो ।  

यो अवधिसम्म कम्पनीको रिटेन्ड अर्निङ ७ करोड ६० लाख रुपैयाँ र रिजर्भको आकार ७२ करोड ८९ लाख रुपैयाँ रहेको छ ।  

३ अर्ब ६२ करोड रुपैयाँबराबरको निक्षेप संकलन गरेको कम्पनीले १४ अर्ब १४ करोड रुपैयाँबराबरको कर्जा प्रवाह गरेको छ । कम्पनीको खराब कर्जा अनुपात ७.८७ प्रतिशतबाट घटेर ७.७८ प्रतिशत पुगेको छ ।

यस्तै कम्पनीको वितरणयोग्य मुनाफा ७ करोड ६० लाख रुपैयाँ रहेको छ भने वार्षिक वितरणयोग्य प्रतिसेयर आम्दानी ५.७६ रुपैयाँ रहेको छ ।  

समीक्षा अवधिसम्म कम्पनीको प्रतिसेयर आम्दानी(ईपीएस)१२.०५ रुपैयाँ,प्रतिसेयर  नेटवर्थ १६०.९९ रुपैयाँ,प्रतिसेयर कुल सम्पत्तिको मूल्य १ हजार १४४.९१ रुपैयाँ,मूल्य आम्दानी अनुपात ५४.९२ गुणा र तरलता अनुपात ५.७७ प्रतिशत कायम भएको छ ।