काठमाण्डौ । अमेरिकी राष्ट्रपति डोनाल्ड ट्रम्पले करिब १ सय देशमाथि ट्यारिफको सूची सार्वजनिक गरेसँगै विश्व सेयर बजारमा उच्च गिरावट आएको छ । ट्यारिफका कारण विश्व व्यापार युद्ध निम्तिने सम्भावनाले विश्वभरका लगानीकर्तामा भयको वातावरण सिर्जना भएको छ ।
अमेरिकी सेयर बजारमा मापक इनडेक्स डाउ जोन्स २.५६ प्रतिशत अर्थात १०६९ अंकले घटेको छ । यस्तै एस एण्ड पी ५०० फ्युचर्स ३.६ प्रतिशत र नास्डक–१०० फ्युचर्स पनि ४.५ प्रतिशतले घटेको छ ।
बहुराष्ट्रिय कम्पनीहरुको सेयरमूल्यमा व्यापक गिरावट आएको छ । नाइकी र एप्पलको सेयरमूल्य करिब ७ प्रतिशतले घटेको छ । आयातिति वस्तुहरु बिक्री गर्ने ठूला बिक्रीकर्ता कम्पनीहरु जस्तै फाइभ बिलोको सेयरमूल्य १४ प्रतिशत, डलर ट्रिको ११ प्रतिशत र ग्यापको ८.५ प्रतिशतले घटेको छ ।
यसैगरी टेक कम्पनीको सेयरमूल्य पनि घटेको छ । एनभिडियाको सेयरमूल्य ५ प्रतिशत र टेस्लाको ७ प्रतिशतले ओरालो लागेको छ ।
एशियाली सेयर बजारमा समेत ट्रम्पको ट्यारिफको प्रभाव परेको छ । आज अधिकांश एशियाली सेयर बजारले गिरावटका साथ कारोबारको सुरुवात गरेका छन् । जापानको सेयर बजार मापक इन्डेक्स निक्की२२५ आज ३.५३ प्रतिशत अर्थात १ हजार २६० अंकले खस्किएको छ । यो गिरावटसँगै निक्की२२५ इन्डेक्स ३४ हजार ५०१ विन्दुमा कारोबार भईरहेको छ ।
हङकङको हाङसेङ इन्डेक्स पनि १.५८ प्रतिशत, चीनको सीएसआई३०० इन्डेक्स ०.७१ प्रतिशत, दक्षिण कोरियाको कोस्पी १.०७ प्रतिशत,कोस्डाक ०.२१ र अष्ट्रेलियाको एस एण्ड पी÷एएसएक्स२०० इन्डेक्स १.०७ प्रतिशतले घटेको छ ।