सेयर धितो राखेर ऋण लिने बढे, बैंक/वित्तीय संस्थाबाट ८ महिनामै रु. १.१८ खर्ब प्रवाह

काठमाण्डौ । बैंक तथा वित्तीय संस्थाबाट लगानीकर्ताहरुले आफ्नो स्वामित्वमा भएको सेयरधितो राखेर सवा एक खर्ब कर्जा लिएका छन् ।

नेपाल राष्ट्रबैंककाअनुसार चालु आवको आठ महिनासम्ममा सेयर लगानीकर्ताहरुले क, ख र ग वर्गका बैंक वित्तीय संस्थाबाट सेयरधितो राखेर एक खर्ब १८ अर्ब ५० करोड रुपैयाँ लोन लिएका छन् । 

यो कर्जा रकम गत आवको सोही अवधिसम्मको तुलनामा ३८.३३ प्रतिशत बढी हो । गत आवको आठ महिनासम्ममा लगानीकर्ताहरुले बैंक वित्तीय संस्थाबाट सेयर धितो राखेर जम्मा ८५ अर्ब ६६ करोड रुपैयाँ कर्जा लिएका थिए ।  

बैंकले आफ्नो व्यवस्थाअनुसार कुनै पनि व्यक्तिको स्वामित्वमा रहेको पुरानो सेयर वा आगामी दिनमा खरिद गर्ने सेयरलाई धितोको रुपमा राखेर कर्जा प्रवाह गर्न सक्दछ ।  

लगानीकर्ताहरुले पनि आफ्नो नाममा भएको सेयर बैंक तथा वित्तीय संस्थामा धितो राखी कर्जा लिन पाउने व्यवस्था छ । तर सेयर धितो राखेर लिएको कर्जा भने लगानीकर्ताहरुले जुनसुकै प्रयोजनका लागि प्रयोग गर्न पाउने व्यवस्था छ ।

धितोपत्र दोस्रो बजारमा कारोबार गर्ने लगानीकर्ताहरुको संख्या थपिँदै गएसँगै बैंक तथा वित्तीय संस्थाहरुबाट सेयर धितो राखेर कर्जा लिनेको संख्या पनि बृद्धि भएको छ ।  

सो अवधिसम्म वाणिज्य बैंकहरुमा एनआइसी एशिया, हिमालयन बैंक, विकास बैंकहरुमा महालक्ष्मी विकास बैंक, सिन्धु विकास बैंक, मितेरी डेभलपमेन्ट बैंक र फाइनान्स कम्पनीहरुः आइसीएफसी फाइनान्स, रिलायन्स फाइनान्स, गुडविल फाइनान्स, प्रोगेसिभ फाइनान्स र पोखरा फाइनान्सको यस्तो कर्जा प्रवाह घटेको छ भने बाँकी सबै बैंक वित्तीय संस्थाको बढेको छ ।  

राष्ट्र बैंकका अनुसार वाणिज्य बैंकहरुबाट मात्रै सो अवधिसम्म ९६ अर्ब ३९ करोड रुपैयाँ बराबरको कर्जा प्रवाह भएको छ । यो रकम गत आवको सोही अवधिसम्मको तुलनामा ४३.६७ प्रतिशत बढी हो । गत आवको आठ महिनासम्ममा भने बैंकहरुबाट ६७ अर्ब ९ करोड रुपैयाँ बराबरको सेयर धितो कर्जा प्रवाह भएको थियो । 

सबैभन्दा बढी नबिल बैंकबाट मात्रै १३ अर्ब ८२ करोड रुपैयाँ बराबरको सेयर धितो कर्जा प्रवाह भएको छ । त्यस्तै, सबैभन्दा कम नेपाल एसबिआआई बैंकबाट जम्मा ४७ करोड रुपैयाँ मात्रै कर्जा प्रवाह भएको छ ।  

त्यस्तै, विकास बैंकहरुबाट प्रवाह भएको यस्तो कर्जा पनि गत आवको तुलनामा १९.७९ प्रतिशत बढेको छ । चालु आवको फागुन महिनासम्ममा विकास बैंकहरुबाट लगानीकर्ताहरुले सेयर धितो राखेर १७ अर्ब ८७ करोड १५ लाख रुपैयाँ कर्जा लिएका छन् । गत आवको सोही अवधिसम्म भने लगानीकर्ताहरुले १४ अर्ब ९१ करोड ९२ लाख रुपैयाँ कर्जा लिएका थिए ।  

सबैभन्दा बढी मुक्तिनाथ विकास बैंकबाट लगानीकर्ताहरुले कर्जा लिएका छन् । बैंकबाट फागुन महिनासम्ममा ३ अर्ब ६० करोड रुपैयाँ कर्जा लिएका छन् । त्यस्तै, सबैभन्दा कम मितेरी डेभलपमेन्ट बैंकबाट जम्मा ३ करोड २८ लाख रुपैयाँ मात्रै कर्जा लिएका छन् ।  

यता ग वर्गको वित्तीय संस्थाहरुबाट भने सो अवधिसम्म लगानीकर्ताहरुले ४ अर्ब २३ करोड रुपैयाँ सेयर धितो राखेर कर्जा लिएका छन् । यो रकम गत आवको सोही अवधिसम्मको तुलनामा १५.९० प्रतिशत बढी हो । गत आवको आठ महिनासम्ममा वित्त कम्पनीहरुबाट लगानीकर्ताहरुले ३ अर्ब ६५ करोड रुपैयाँ यस्तो कर्जा लिएका थिए ।  

सबैभन्दा बढी मन्जुश्री फाइनान्सबाट ७६ करोड ७९ लाख रुपैयाँ यस्तो कर्जा प्रवाह भएको छ । त्यस्तै, सबैभन्दा कम भने नेपाल सेयर मार्केट्स एण्ड फाइनान्सबाट जम्मा २ करोड ६१ लाख रुपैयाँ मात्रै यस्तो कर्जा प्रवाह भएको छ ।