१० दिनपछि हिरासत मुक्त भए लगानीकर्ता दीपेन्द्र अग्रवाल

काठमाण्डौ । लगानीकर्ता दीपेन्द्र अग्रवाल हिरासतबाट १० दिनपछि रिहा भएका छन्। 

उनलाई काठमाडौँ जिल्ला अदालतको आदेशमा हाजिर जमानीमा रिहा गरिएको हो। तर प्रहरी अनुसन्धान भने अझै जारी रहने भएको छ।

अग्रवाललाई ठगी र विश्वासघातको आरोपमा साउन ५ गते पक्राउ गरिएको थियो। पक्राउपछि प्रहरीको आर्थिक अपराध महाशाखाले उनलाई सोधपुछ गर्दै आएको थियो। प्रारम्भिक अनुसन्धानपछि प्रहरीद्वारा अदालतमा पेश गरिएका कागजातको अध्ययनपछि काठमाडौँ जिल्ला अदालतले उनलाई सर्तसहित रिहा गर्न आदेश दिएको हो।

अदालतले अग्रवाललाई निश्चित अवधिमा उपस्थित हुनुपर्ने शर्तमा रिहा गर्ने आदेश दिएको हो। यसरी सर्तसहित रिहा भएको अवस्थामा, अग्रवालमाथि अनुसन्धानका लागि प्रहरीलाई थप समय मिल्नेछ।

अनुसन्धान अधिकृतहरूका अनुसार, अग्रवालसँग जोडिएका लेनदेन, साझेदारी र पूर्व लगानीकर्तासँग भएका सम्झौताहरूको गहिरो अध्ययन भइरहेको छ। प्रहरी स्रोतका अनुसार अनुसन्धान अझै टुंगोमा पुगेको छैन र आवश्यक परे थप बयानको लागि उनलाई पुनः बोलाउन सकिनेछ।