अर्थमन्त्रीको तागेतापछि सेबोनद्वारा वृहत छलफल, संयुक्त सुझाव आइतबार बुझाइने

काठमाण्डौं । अर्थमन्त्री बर्षमान पुनले मागेका पुँजीबजारका समस्या पहिचान  र समाधानका उपायसहितको कार्ययोजना बनाउने बिषयमा बिहीबार नेपाल धितोपत्र बोर्डमा घनिभूत रुपमा छलफल भएको छ ।  

धितोपत्र बोर्डका निमित्त अध्यक्ष नबराज अधिारीले दिएको जानकारी अनुसार  आजको छलफलमा नेप्से, सीडीएसी, मर्चेण्ट बैंकर, दुईवटा ब्रोकर एसोसिएसन, क्रेडिट रेटिङ एजेन्सीहरु, एफएनसीसीआई, सिएनआई, एनसीसी लगायतसँग बृहत छलफल भएको हो । 

छलफलमा सहभागी सबै संस्थाका प्रतिनिधिहरुले धितोपत्र बोर्डलाई बजार सुधारका लिखित कार्ययोजना पेश गरेका छन् । लगानीकर्ताहरुको तर्फबाट पनि सुझाव आएको अधिकारीले जानकारी दिए ।  

सीडीएसीका प्रमुख कार्यकारी अध्यक्ष पूर्णप्रसाद आचार्यका अनुसार छलफलमा सहभागी सबैले आफ्नो तर्फबाट बोर्डलाई सुझाव पेश गरेका छन् ।  

सो क्रममा मर्जर तथा प्राप्तिमा गएका कम्पनीहरुको करको विषयमा पनि सुझाव आएको छ ।  

यस्तै, राष्ट्रबैंकले सेयर धितो कर्जामा लगाएको १५–२० करोडको क्याप हटाउनुपर्ने  र हालको जोखिम भार घटाउनुपर्ने विषय पनि सुझावको रुपमा आएका छन् ।  

ब्रोकरहरुमार्फत दिने मार्जिन कारोबारको स्रोत पहिचान र कार्यान्वयनको विषयलाई पनि प्राथमिकताका साथ अगाडि बढाउनुपर्ने सुझाव सरोकारवालाले दिएका छन् ।  

सरोकारवालाले बजारको आन्तरिक र तत्काल सुधार गर्नुपर्ने विषयलाई समेत प्राथमिकताका साथ पेश गरेका छन् । जसमा अक्सन मार्केटको सुरुवात, नागरिक लगानीकोष, सामाजिक सुरक्षाकोष र कर्मचारी सञ्चय कोषलाई सेयरबजारमा लगानी गर्न सहज बनाउने र बजार सन्तुलन राख्न लगाउने जस्ता विषय रहेका छन् ।  

यस्तै, कम्पनीहरुको साधारणसभामा इभोटिङलाई कानूनी मान्यता दिने, जलविद्युत कम्पनीको लकिङ तीन बर्ष पुगे पनि एकैपटक नखोलेर चरणबद्ध रुपमा मात्रै खोल्नुपर्ने सुझाव पनि छलफलका क्रममा आएका सिडीएससीका सीइओ आचार्यले जानकारी दिए ।  

उनकाअनुसार आज संयुक्त रुपमा छलफल भएर विभिन्न क्षेत्रबाट आएका सुझावहरुलाई एकीकृत गरेर धितोपत्र बोर्डले एउटै फाइल तयार पारको छ । जसलाई आइतबार बुझाउने योजना छ ।