एनएमबी बैंकको ३०औँ वार्षिक साधारण सभा सम्पन्न, १० प्रतिशत लाभांश पारित

काठमाण्डौ । एनएमबी बैंक लिमिटेडको ३०औँ वार्षिक साधारण सभा (एजीएम) बिहीबार काठमाडौंको टुँडिखेलस्थित त्रिभुवन आर्मी अफिसर्स क्लबमा सम्पन्न भएको छ। बैंक सञ्चालक समितिका अध्यक्ष मनोज कुमार गोयलको अध्यक्षतामा सम्पन्न सभामा शेयरधनीहरूको उल्लेखनीय उपस्थिति रहेको थियो।

सभाले चालु चुक्ता पूँजीका आधारमा कुल १० प्रतिशत लाभांश वितरण गर्ने प्रस्ताव पारित गरेको छ। जसअनुसार ५ प्रतिशत बोनस शेयर र ५ प्रतिशत नगद लाभांश (कर प्रयोजनसहित) शेयरधनीलाई वितरण गरिनेछ।

बैंकले आर्थिक वर्ष २०८१/८२ मा २ अर्ब ८५ करोड रुपैयाँ खुद नाफा आर्जन गरेको जानकारी सभामा प्रस्तुत गरिएको छ। सोही अवधिसम्म बैंकले २ खर्ब ८३ अर्ब रुपैयाँभन्दा बढी निक्षेप संकलन गरेको छ भने २ खर्ब ४३ अर्ब रुपैयाँभन्दा बढी कर्जा प्रवाह गरेको वित्तीय विवरण सार्वजनिक गरिएको छ।

हाल एनएमबी बैंकले देशभर २०२ वटा शाखा, १८४ वटा एटिएम तथा ९ वटा एक्सटेन्सन काउन्टरमार्फत बैंकिङ सेवा प्रदान गर्दै आएको छ। सभामा बैंकको समग्र वित्तीय अवस्था, भविष्यको रणनीति तथा बैंकिङ सेवाको विस्तारबारे पनि छलफल गरिएको थियो।