एसबीआई बैंकबाट लुटिएकोमध्ये कति नगद फेला परेको हो ? प्रहरीकै दुई फरक सूचना सन्देहपूर्ण

काठमाण्डौ । सिन्धुलीको घ्याङ्लेख गाउँपालिका–२ स्थित एसबीआई बैंकको शाखाबाट लुटिएकोमध्ये २ करोड १० लाख नगद नजिकैको जंगलमा फेला परेको छ ।  

बोरामा नगद राखेर भाग्दै गरेको अवस्थामा लुटपाटमा संलग्न ४ जनालाई पनि पक्रा गरिएको जिल्ला प्रहरी प्रमुख एसपी लालध्वज सुवेदीले बिजशालालाई बताएका छन् । 

एसपी सुवेदीले १ करोड ८० लाख हाराहारी लुटिएको नगद फेला परेको बताए पनि जिल्ला प्रहरी कार्यालयकै सञ्चार शाखाका एक हवल्दारले भने २ करोड १० लाख नगद फेला परिसकेको दाबी गरेका छन् ।  

एसपी सुवेदी र उनकै नेतृत्वको प्रहरी कार्यालयको सञ्चार शाखाको नगद फेला परेको विषयका दुई फरक फरक दाबी शंकास्पद देखिन्छ । 

एसपी सुवेदीले एसबीआई बैंकको सो शाखाबाट लुटेरा समूहले ३ करोड १० लाख हाराहारी पैसा लुटेको आफूहरुलाई जानकारी प्राप्त भएको समेत बताएका छन् ।  

उनका अनुसार बैंकको सो शाखामा ६ ७ जनाको समूहमा नकाबधारीहरु आएर कर्मचारीलाई नियन्त्रणमा लिएका थिए । बैंकका सुरक्षागार्डलाई आक्रमण गरी गम्भीर घाइते बनाई लुटेरा समूहले बैंक लुटपाट गरेको थियो ।  

लुटेराहरु चढेर आएको गाडी तथा त्यसका चालकलाई हिजै राति प्रहरीले नियन्त्रणमा लिएको थियो । त्यो गाडीलाई काभ्रेको बनेपाबाट लगिएको समेत खुलिसकेको छ ।