भारतको अर्थतन्त्रभन्दा ८ गुणा बढी भयो सुनको मार्केट क्याप, अमेरिका र चीन पनि पछाडि परे !

काठमाण्डौ । अन्तर्राष्ट्रिय बजारमा सुन र चाँदीको मूल्यले नयाँ इतिहास रचेको छ । आज सुनको मूल्य प्रतिऔंस ५,१०० अमेरिकी डलर नाघेको छ भने चाँदीको मूल्य पनि १०८ डलर प्रतिऔंस पार पुगेको छ । मूल्यसँगै सुन र चाँदीको मार्केट क्यापिटलाइजेसन समेत ऐतिहासिक स्तरमा पुगेको छ।

हाल सुनको कुल मार्केट क्याप ३५ ट्रिलियन डलर नाघेको छ भने चाँदीको मार्केट क्याप ६ ट्रिलियन डलरभन्दा बढी पुगेको छ । सुन–चाँदी दुवैको संयुक्त मार्केट क्याप संसारकै सबैभन्दा मूल्यवान कम्पनी मानिने एआई चिप निर्माता एनभिडियाको भन्दा करिब नौ गुणा बढी हो । एनभिडियाको हालको मार्केट क्याप ४.५६९ ट्रिलियन डलर रहेको छ।

विश्व अर्थतन्त्रभन्दा पनि बलियो सुन

सुन हाल विश्वकै सबैभन्दा मूल्यवान एसेट बनेको छ । सुनको मार्केट क्याप केवल कम्पनीहरूलाई मात्र होइन, ठूला देशहरूको अर्थतन्त्रलाई समेत उछिन्दै अघि बढेको छ । फोर्ब्सका अनुसार भारतको कुल गार्हस्थ उत्पादन (जीडीपी) ४.१३ ट्रिलियन डलर रहेको छ, जुन सुनको मार्केट क्यापभन्दा करिब ८ गुणा कम हो । चाँदीको मार्केट क्याप पनि भारतको जीडीपीभन्दा बढी भइसकेको छ।

त्यस्तै, सुनको मार्केट क्याप विश्वको सबैभन्दा ठूलो अर्थतन्त्र अमेरिका (३०.६२ ट्रिलियन डलर) को जीडीपीभन्दा बढी र चीन (१९.४ ट्रिलियन डलर) को जीडीपीभन्दा करिब दोब्बर रहेको छ।

विश्वका सबैभन्दा मूल्यवान एसेटहरूको सूचीमा सुन र चाँदीपछि एनभिडिया, त्यसपछि गुगलको पेरेंट कम्पनी अल्फाबेट (३.९६४ ट्रिलियन डलर) र एप्पल (३.६६५ ट्रिलियन डलर) रहेका छन्।

यस वर्ष कति बढ्यो मूल्य?

सन् २०२६ सुरु भएयता सुनको मूल्यमा करिब १८ प्रतिशत वृद्धि भएको छ भने चाँदीको मूल्यमा झन्डै ५१ प्रतिशत उछाल आएको छ । विश्लेषकहरूका अनुसार आगामी दिनहरूमा यी दुवै बहुमूल्य धातुको मूल्यमा ठूलो उतार–चढाव देखिन सक्छ।

अमेरिका, फेड र बजेटको असर

अमेरिकाको सुप्रीम कोर्टमा पूर्व राष्ट्रपति डोनाल्ड ट्रम्पले लगाएका ट्यारिफहरूको वैधतामाथि सुनुवाइ हुन लागेको छ । साथै अमेरिकी केन्द्रीय बैंक (फेडरल रिजर्भ) ले ब्याजदरसम्बन्धी निर्णय लिने तयारी गरिरहेको छ । यी दुवै घटनाले सुन–चाँदीको मूल्यमा प्रत्यक्ष असर पार्ने विश्लेषकहरूको भनाइ छ।

त्यसैगरी, फेब्रुअरी १ मा भारतकी वित्त मन्त्री निर्मला सीतारमणले बजेट प्रस्तुत गर्ने तयारीमा रहेकी छन् । बजेटमा सुन–चाँदीको आयात शुल्क (इम्पोर्ट ड्युटी) मा परिवर्तन भएमा त्यसको असर दक्षिण एसियाली बजार हुँदै नेपाली बजारसम्म पनि पर्न सक्ने अनुमान गरिएको छ।