रास्वपाको चुनावी वाचापत्र सार्वजनिक, २०४६ सालयता सार्वजनिक पद धारण गरेकाको सम्पत्ति छानबिन गरिने

काठमाण्डौ। राष्ट्रिय स्वतन्त्र पार्टी (रास्वपा) ले चुनावी वाचापत्र सार्वजनिक गरेको छ। रास्वपाले आफूलाई संस्थागत रूपान्तरणको एजेन्डा बोकेको शक्तिका रूपमा प्रस्तुत गर्दै ‘रूपान्तरणका लागि नीतिगत प्रस्थानका १०० आधार’ सार्वजनिक गरेको हो।  

रास्वपाले आज कर्णाली प्रदेशको राजधानी सुर्खेतमा आयोजित चुनावी सभामा चुनावी वाचापत्र सार्वजनिक गरेको हो ।

रास्वपाले यसपटकको वाचापत्रलाई परम्परागत आश्वासनको सूचीभन्दा फरक भन्दै प्रणाली सुधारको रोडम्यापका रूपमा व्याख्या गरेको छ। पार्टीले सेवा प्रवाहमा डिजिटल माध्यमलाई अनिवार्य बनाउँदै ‘लाइन होइन, अनलाइन’ अवधारणामार्फत नागरिकलाई घरबाटै सेवा उपलब्ध गराउने योजना अघि सारेको छ। यसले प्रशासनिक ढिलासुस्ती, झन्झट र बिचौलिया संस्कृतिको अन्त्य गर्ने दाबी गरिएको छ।

भ्रष्टाचार नियन्त्रणलाई संरचनात्मक सुधारसँग जोड्दै विसं २०४६ सालयता सार्वजनिक पद धारण गरेका व्यक्तिहरूको सम्पत्ति छानबिन गर्ने र थन्किएका फाइल पुनः खोल्ने घोषणा गरिएको छ।

रास्वपाले शिक्षा, स्वास्थ्य र सार्वजनिक संस्थानहरूलाई दलीय प्रभावबाट मुक्त गर्ने प्रतिबद्धता जनाउँदै आफू कुनै पनि भातृ संगठन नखोल्ने घोषणा गरेको छ।

अर्थतन्त्रतर्फ पार्टीले डिजिटल अर्थतन्त्र, स्टार्टअप प्रवर्द्धन र ‘मेक इन नेपाल’ अभियानमार्फत उत्पादनमुखी मोडेल अघि सारेको छ।  त्यसैगरी, वैदेशिक रोजगारीमा रहेका नेपालीलाई आई–भोटिङमार्फत मतदान अधिकार सुनिश्चित गर्ने तथा गैर–आवासीय नेपालीलाई ‘एक पटकको नेपाली, सधैँको नेपाली’ अवधारणाअनुसार अधिकार सम्पन्न बनाउने एजेन्डाले प्रवासमा रहेका नेपाली समुदायलाई राजनीतिक प्रक्रियामा जोड्ने प्रयास गरेको छ।