सबैलाई पर्ने तीन कम्पनीको आइपीओ आउँदै, कुनको कति ?

काठमाण्डौ । पछिल्लो समय विभिन्न कम्पनीका प्राथमिक सेयर (आइपीओ) धमाधम आउन थालेका छन् । नेपाल धितोपत्र बोर्डले समेत एकपछि एक गर्दै पाइपलाइनमा रहेका कम्पनीहरुलाई आइपीओ नष्कासनको अनुमति दिन थालेको छ ।  

बोर्डले पछिल्लो समय पाइपलाइनमा रहेका कम्पनीहरुको वित्तीय अवस्था हेरेर ९० रुपैयाँ भन्दा बढी नेटवर्थ भएका कम्पनीहरुलाई आईपीओ निष्कासनको स्वीकृति दिन थालेको हो ।  

एकपछि एक गर्दै विभिन्न सेक्टरका कम्पनीको आईपीओ आएपनि लगानीकर्ताहरुले १० कित्ता सेयर पाउन पनि भाग्यकै भर पर्नुपर्ने अवस्था छ । सिडिएस एण्ड क्लियरिङ्ग लिमिटेडका अनुसार पछिल्लो समय जुनसुकै कम्पनीको आईपीओ खुलेपनि सर्वसाधारणतर्फ न्यूनतम २० लाख बढी आवेदकको आवेदन पर्ने गरेको छ ।  

आईपीओमा आवेदनको ओइरो लाग्न थालेपछि अहिले कतिपय लगानीकर्ताहरुले त आइपीओ नै भर्न छाडेका छन् । सिडिएससीका अनुसार नेपालमा ६० लाख भन्दा बढी डिम्याट खाता खुलिसकेका छन् । तीमध्ये ३० प्रतिशत भन्दा बढी खाताहरुमा एक कित्ता सेयर पनि छैनन्, जसलाई निष्क्रिय खाताको रुपमा हेर्न सकिन्छ ।  

धमाधम आईपीओ खुलेपनि कित्ता संख्या थोरै हुने भएकाले सीमित लगानीकर्ताले मात्रै सेयर पाउने गर्छन् । आईपीओमा परेको आवेदन बमोजिम ५ वा १० प्रतिशत लगानीकर्ताले मात्रै सेयर पाउछन् भने ९० वा ९५ प्रतिशत आवेदकको हात खाली हुने अवस्था पछिल्लो समय छ ।  

पछिल्लो समय कुनै पनि कम्पनीको आईपीओ खुलेको छ र तपाईले आफ्ना १० जना सदस्यीय परिवार सम्पूर्णको सेयर भर्नुभएको छ भने एक जनालाई मात्रै सेयर पाउने सम्भावना रहन्छ ।  

तर नेपाल धितोपत्र बोर्डको पाइपलाइनमा त्यस्ता कम्पनीहरु पनि छन्, जसमा ९० देखि ९५ प्रतिशत आवेदकलाई पर्ने सम्भावना देखिन्छ । यसर्थमा तपाईले १० जना सदस्य रहेको परिवार सम्पूर्णको सेयरमा आवेदन दिनुभएको खण्डमा ८ देखि ९  जनालाई पर्ने सम्भावना देखिन्छ ।  

बोर्डको पाइपलाइनमा हाइड्रो सेक्टरबाट सिउरी न्यादी पावर, उत्पादन तथा प्रशोधन सेक्टरबाट जगदम्बा स्टिल्स लिमिटेड र शुभश्री अग्नि सिमेन्ट उद्योग रहेको छ । यी कम्पनीहरुको आइपीओ भर्दा सियोर सट पर्ने सम्भावना रहन्छ ।