भाटभटेनी भरतपुर शाखा पुनः सञ्चालन

काठमाण्डौ । जेनजी आन्दोलनका कारण ठूलो क्षति व्यहोरेको भाटभटेनी सुपरमार्केटले पुनःस्थापनातर्फ महत्वपूर्ण प्रगति गरेको छ। यस क्रममा चितवनको भरतपुर शाखा पुनर्निर्माणपछि शुक्रबारदेखि पुनः सञ्चालनमा आएको छ ।  

सात महिना तीन दिनको अवधिमा पुनर्निर्माण सम्पन्न गरिएको उक्त शाखा पूर्ण रूपमा जलेर नष्ट भएको थियो। पुनः सञ्चालनको पहिलो दिनमै देखिएको ग्राहकको उल्लेखनीय उपस्थिति बजारप्रतिको उपभोक्ता विश्वास अझै कायम रहेको संकेतका रूपमा हेरिएको छ।

कम्पनीका सञ्चालक मीनबहादुर गुरुङले कठिन परिस्थितिबीच पनि सेवा निरन्तरता दिनु व्यवसायिक दायित्व भएको उल्लेख गर्दै अबको सेवा अझ परिष्कृत र ग्राहककेन्द्रित हुने प्रतिबद्धता व्यक्त गरे। उनका अनुसार भरतपुर शाखामा मात्रै करिब एक अर्ब रुपैयाँ बराबरको क्षति भएको थियो।

जेनजी आन्दोलनले भाटभटेनीका देशभर रहेका ३३ शाखामध्ये १२ वटा पूर्ण रूपमा ध्वस्त पार्दा १६ वटा शाखामा लुटपाट भएको थियो। यसबाट करिब १६ अर्ब रुपैयाँ बराबरको क्षति पुगेको बताइएको छ। बीमामार्फत आंशिक राहत प्राप्त भए पनि आयातित वस्तुमा अपेक्षित भन्सार छुट नपाउँदा पुनःस्थापनामा चुनौती थपिएको कम्पनीको भनाइ छ।

हालसम्म भरतपुरसहित कोटेश्वर, महाराजगञ्ज र बालुवाटारस्थित वेयरहाउस पुनः सञ्चालनमा आइसकेका छन् भने बाँकी शाखाहरू क्रमशः पुनर्निर्माणको चरणमा रहेका छन्।