सरकारले बर्खास्त गर्ने सूइँको पाएपछि राजीनामा दिए सेबोन अध्यक्ष श्रेष्ठले, पूँजीबजारकै कालो अध्याय लेखाए

काठमाण्डौ । विवादास्पद निर्णयहरु गरी कार्यकाललाई पूँजीबजारको अँध्यारो अध्यायको रुपमा दर्ज गरेका नेपाल धितोपत्र बोर्ड-सेबोन)का अध्यक्ष सन्तोषनारायण श्रेष्ठले राजीनामा दिएका छन् ।  

आज साँझ सेबोनको बोर्ड बैठक बोलाएर त्यसमै उनले आफूले राजीनामा गर्ने निर्णयमा पुगेको भन्दै सञ्चालक तथा सहयोगीहरुलाई धन्यवाद दिएका थिए । 

एक सञ्चालकले बिजशालालाई बताएअनुसार उनले अर्थमन्त्रीबाटै आफूलाई राजीनामा भनिएका कारण जिम्मेवारीबाट अलग भई सरकारलाई सहयोग गर्न लागेको बैठकमा बताएका थिए । 'अर्थमन्त्री ज्यूबाटै भनिएपछि म राजीनामा दिएर नयाँ सरकारलाई सहयोग गर्ने निर्णयमा पुगेको छु ।' थुप्रै भ्रष्टाचार मुद्दाका फाइलहरु पुनः खोलेका कारण कारबाहीको हिटलिस्टमा परेपछि नैतिकताका आधारमा राजीनामा दिएका श्रेष्ठको भनाई उद्धृत गर्दै ती सञ्चालकले भने-'उहाँले हामीलाई पनि धन्यवाद दिनुभयो र आजै अर्थमन्त्रालयमा पुगेर राजीनामापत्र बुझाउने बताउनुभएको छ ।' 

शुक्रबार दिउँसोदेखि नै उनले राजीनामा दिने चर्चा भइरहेको थियो । तर, त्यसबेलासम्म उनले औपचारिक रुपमा कहीँ कतै राजीनामा दिइसकेका थिएनन् । उनले केही निकटस्थहरुसँग मात्र यसबारेमा कुराकानी गरेका थिए ।  

यसअघि अर्थमन्त्रालयबाट उनलाई बोलाएर तत्काल राजीनामा गर्न निर्देशन दिइएको थियो । 'मन्त्रीको सन्देश' भन्दै उनलाई तत्काल पद त्यागेर उनीमाथि भइरहेका अनेकौं अनुसन्धानहरुमा सहयोग गर्न निर्देश भएको थियो । 

उनीमाथि पछिल्लो समय सम्पत्ति शुद्धिकरणले समेत अनुसन्धान गरिरहेको छ । त्यसअघि उनीविरुद्ध थुप्रै उजुरी अख्तियार दुरुपयोग अनुसन्धान आयोगमा परेको थियो । अख्तियारले समेत नयाँ सरकार बनेलगत्तै ती पुराना उजुरीहरुको फाइल खोलेर अनुसन्धान अगाडि बढाएको थियो । आफूले राजीनामा नदिए सरकारले बर्खास्त गर्ने सूइँको पाएपछि सेबोन अध्यक्ष श्रेष्ठ अन्ततः राजीनामा गर्ने निश्कर्षमा पुगेका उनी निकट स्रोत दाबी गर्छ ।