ब्याज आम्दानीसँगै घट्यो स्ट्याण्डर्ड चार्टर्ड बैंकको नाफा, लाभांश क्षमतामा समेत ह्रास

काठमाण्डौ । ब्याज आम्दानीमा संकुचन आउदा स्ट्याण्डर्ड चार्टर्ड बैंकको नाफा घटेको छ । बैंकले समीक्षा अवधिसम्म २ अर्ब ८ करोड रुपैयाँबराबरको खुद नाफा आर्जन गरेको छ । यो रकम अघिल्लो आवको सोही अवधिससम्म बैंकले आर्जन गरेको तुलनामा ४.२४ प्रतिशतले कम हो ।

अघिल्लो आवको तेस्रो त्रैमाससम्म बैंकले २ अर्ब १७ करोड रुपैयाँबराबरको खुद नाफा कमाएको थियो ।

यस्तै बैंकको खुद ब्याज आम्दानी समेत १०.०६ प्रतिशतले घटेर २ अर्ब ९१ करोडमा सीमित बनेको छ । बैंकको वितरणयोग्य मुनाफामा समेत कमी आएको छ । अघिल्लो आवमा १  अर्ब ४७ करोड रुपैयाँ रहेको वितरणयोग्य मुनाफा घटेर १ अर्ब ३५ करोड रुपैयाँमा सीमित बनेको छ ।

लाभांश क्षमता समेत १९.३५ प्रतिशतबाट घटेर १७.६७ प्रतिशतमा आईपुगेको छ ।

समीक्षा अवधिमा बैंकको निक्षेप संकलन १ खर्ब २५ अर्बबाट बढेर १ खर्ब ४५ अर्ब पुगेको छ । यस्तै कर्जा परिचालन भने ७२ अर्ब ८९ करोडबाट घटेर ६८ करोड ४७ लाखमा सीमित बनेको छ । बैंकको रिटेन्ड अर्निङ १ अर्ब ३५ करोड र रिजर्भ कोषमा १० अर्ब ५५ करोड सञ्चित रहेको छ ।

यस्तै बैंकको खराब कर्जा अनुपात १.४४ प्रतिशतबाट बढेर १.८१ प्रतिशत पुगेको छ । बैंकको रिर्टन अन इक्विटी १२.८७ प्रतिशत,आधार दर ४.३७ प्रतिशत, कस्ट अफ फण्ड २.६१ र सिडिी रेसियो ५२.९५ प्रतिशत रहेको छ ।  

समीक्षा अवधिमा बैंकको प्रतिसेयर आम्दानी २७.६४ रुपैयाँ, पीई अनुपात २३.५५ गुणा र प्रतिसेयर नेटवर्थ २१८.५९ रुपैयाँ कायम भएको छ ।