एनआरएन सेयर चलखेलदेखि दबाइएका अनुसन्धानसम्म, सेबोनका सम्वेदनशील फाइल सम्पत्ति शुद्धिकरणको कब्जामा

काठमाण्डौ । नेपाल धितोपत्र बोर्ड (सेबोन)का निवर्तमान अध्यक्ष सन्तोषनारायण श्रेष्ठमाथि सम्पत्ति शुद्धिकरण विभागले अनुसन्धान तीव्र बनाएको छ । बोर्डमा रहँदा उनले गरेका विवादास्पद निर्णय, रोकिएका अनुसन्धान र थन्क्याइएका संवेदनशील फाइलहरूबारे थप छानबिन गर्न विभागले सेबोनबाट ठूलो परिमाणमा कागजात नियन्त्रणमा लिएको उच्च स्रोतले जनाएको छ ।

दुई दिनअघि सम्पत्ति शुद्धिकरण विभागको टोली सेबोन पुगेको थियो । टोलीले बोर्डका विभिन्न विभागसँग समन्वय गर्दै अनुसन्धानसँग सम्बन्धित फाइल, निर्णय कागजात र आन्तरिक अभिलेख नियन्त्रणमा लिएको स्रोतको दाबी छ ।

विभाग स्रोतका अनुसार युवा व्यवसायी दीपक भट्टमाथिको अनुसन्धानका क्रममा सन्तोषनारायण श्रेष्ठको भूमिका पनि शंकाको घेरामा परेको हो । त्यसपछि श्रेष्ठको कार्यकालमा भएका कतिपय निर्णय, बीचमै रोकिएका अनुसन्धान र दबाइएका फाइलमाथि विभागले विशेष चासो दिएको बताइएको छ ।

स्रोतका अनुसार श्रेष्ठसँग विभागले एकभन्दा बढी चरणमा बयान लिइसकेको छ । अनुसन्धानको दबाब बढेपछि उनले हतारमा राजीनामा दिएको दाबी समेत विभाग निकट स्रोतको छ । सार्वजनिक रूपमा भने उनले नयाँ सरकारलाई सहयोग गर्न आफूले पद छाडेको सन्देश दिन खोजेका थिए ।

राजीनामापछि पनि विभागले श्रेष्ठसँग पुनः बयान लिएको र सो क्रममा उनले दिएको जानकारी तथा विभागले प्राप्त गरेको सूचनाबीच असंगति देखिएपछि थप प्रमाण संकलनका लागि सेबोनमै पुगेर कागजात नियन्त्रणमा लिइएको एक अधिकारीले बताए ।

ती अधिकारीका अनुसार प्रारम्भिक अनुसन्धानमै दीपक भट्टसँग सम्बन्धित केही स्वार्थप्रेरित निर्णयमा श्रेष्ठको संलग्नता देखिएको छ । अनुसन्धानमा श्रेष्ठ स्वयंले पनि निश्चित स्वार्थ समूहलाई लाभ पुग्ने गरी निर्णय गरेको आशंका बलियो बनेको स्रोतको भनाइ छ ।

अनुसन्धानमा सबैभन्दा गम्भीर रूपमा उठेको विषय भनेको बोर्डभित्रै भएका संवेदनशील अनुसन्धानलाई बीचमै रोक्नु र तयार भइसकेका फाइलहरू थन्क्याउनु हो । विभागका एक अधिकारीले भने, “हामी सम्पत्ति शुद्धिकरणको कोणबाट हेरिरहेका छौँ । ती फाइल किन रोकिए ? त्यस क्रममा कुनै लाभ लिइयो कि लिइएन भन्ने विषयमा अनुसन्धान भइरहेको छ ।”

उनका अनुसार बोर्डमा रहँदा श्रेष्ठले सम्पत्ति शुद्धिकरणसम्बन्धी कसूर गरे–नगरेको कोणबाट समेत अनुसन्धान अघि बढाइएको छ ।

सेबोन स्रोतले पनि विभागले पछिल्लो पटक ठूलो संख्यामा कागजात नियन्त्रणमा लिएको पुष्टि गरेको छ । यसअघि पनि विभागको टोलीले केही कागजात लगेको थियो । “दुई दिनअघि फेरि टोली आयो, यसपटक थप धेरै फाइल र कागजात लगिएको छ,” स्रोतले भन्यो ।

अनुसन्धानको केन्द्रमा एनआरएन इन्फ्रास्टक्चरको सेयर कारोबारसम्बन्धी विवादास्पद प्रकरण पनि परेको छ । स्रोतका अनुसार उक्त कम्पनीको सेयर मूल्य चलखेल, केही ब्रोकरको मिलेमतो तथा इन्साइडर ट्रेडिङसँग सम्बन्धित फाइलहरू समेत विभागले नियन्त्रणमा लिएको छ ।

त्यसबारे सन्तोषनारायण श्रेष्ठकै निर्देशनमा एक कार्यकारी निर्देशकलाई अनुसन्धान जिम्मा दिइएको थियो । तर अनुसन्धानले दोषी औँल्याएका व्यक्तिमाथि कारबाही गर्नुको साटो फाइल नै दबाइएको आरोप छ । भिडियो फुटेजजस्ता संवेदनशील प्रमाण समेत लुकाइएको दाबी स्रोतको छ ।

स्रोतका अनुसार एनआरएन इन्फ्रास्टक्चर प्रकरणको प्रतिवेदन तयार पार्न र पछि त्यसलाई गुपचुप राख्न बोर्डभित्रकै केही उच्च अधिकारीले पनि श्रेष्ठलाई साथ दिएका थिए ।