नीति तथा कार्यक्रम विवादमा कोशी प्रदेशसभा बन्यो रणभूमि, पूर्वमुख्यमन्त्री राईले भाँचे माइक

काठमाडौं । कोशी प्रदेशको प्रदेशसभा बुधबार तनावग्रस्त बनेको छ ।  

सरकारको आगामी आर्थिक वर्षको नीति तथा कार्यक्रमलाई लिएर सत्ता पक्ष र विपक्षी दलबीच तीव्र विवाद चर्किएपछि बैठक अवरुद्ध मात्र भएन, पूर्वमुख्यमन्त्री राजेन्द्रकुमार राईले रोस्टमको माइक नै भाँच्ने घटना पनि भएको छ ।

विवादको केन्द्रमा नीति तथा कार्यक्रममाथिको संशोधन प्रस्ताव परेको छ ।

विपक्षी दलका सांसदहरूले आफूहरूलाई संशोधन प्रस्ताव दर्ता गर्न समय नदिई सरकारले प्रक्रिया मिचेर नीति तथा कार्यक्रम पारित गराएको आरोप लगाएका छन् ।

प्रदेश प्रमुख पर्शुराम खापुङले जेठ ७ गते प्रस्तुत गरेको नीति तथा कार्यक्रममाथि मंगलबार मुख्यमन्त्री हिक्मतकुमार कार्कीले जवाफ दिएका थिए ।  

त्यसपछि सभामुख अम्बरबहादुर विष्ट ले कार्यक्रमलाई निर्णयार्थ प्रस्तुत गरी पारित गराएका थिए ।

तर, विपक्षी सांसदहरूले संशोधन प्रस्ताव हाल्नुपर्ने संवैधानिक र संसदीय अधिकार खोसिएको भन्दै बुधबार बैठकमै चर्को विरोध जनाए ।

विशेषगरी नेपाल कम्युनिस्ट पार्टी (नेकपा) का सांसदहरूले नियमावली उल्लंघन भएको आरोप लगाउँदै रोस्टम घेराउ र नाराबाजी गरेका थिए ।

नेकपा संसदीय दलका नेता इन्द्रबहादुर आङ्बोले १७ जना विपक्षी सांसदले संशोधन प्रस्ताव राख्न चाहेको भएपनि सभामुखले त्यसका लागि आवश्यक समय र प्रक्रिया उपलब्ध नगराएको आरोप लगाए ।  

उनले “संसदीय प्रक्रिया नै मिचिएको अवस्थामा नीति तथा कार्यक्रम वैधानिक मान्न सकिँदैन” भन्ने धारणा राखेका थिए ।

तनाव बढ्दै जाँदा सभामुखले बैठक सञ्चालनका लागि निर्मला तावा लिम्बू लाई बोल्न समय दिएका थिए ।

त्यसलगत्तै विपक्षी सांसदहरू रोस्टमतर्फ पुगेका थिए । सोही क्रममा पूर्वमुख्यमन्त्री राजेन्द्रकुमार राईले माइक भाँचिदिएपछि बैठक थप तनावपूर्ण बनेको थियो ।

माइक तोडिएको घटनापछि सभामुख विष्ट आक्रोशित बनेका थिए भने सत्ता पक्षीय सांसदहरूले विपक्षी दलले नै कार्य व्यवस्था परामर्श समितिको सहमति उल्लंघन गरेको आरोप लगाएका छन् ।

प्रदेशसभा सञ्चालन नियमावलीको दफा ३७ लाई लिएर पनि विवाद चर्किएको छ ।  

विपक्षी दलले उक्त व्यवस्थाअनुसार संशोधन प्रस्ताव दर्ता गर्न पाउनुपर्ने दाबी गरेका छन् ।  

तर, सभामुखले “उपयुक्त ठहरिएमा मात्रै संशोधन स्वीकार गर्न सकिने” व्याख्या गर्दै आएका छन् ।

तनावका बीच सांसद राईले सभामुखलाई “तपाईं आफ्नो बाटो जानुस्, हामी हाम्रो बाटो जान्छौँ” भन्दै कडा अभिव्यक्ति दिएका थिए ।  

लामो समयसम्म सत्ता–प्रतिपक्षबीच आरोप–प्रत्यारोप र नाराबाजी चलिरहेपछि प्रदेश सभा बैठक अन्ततः आधा घण्टाका लागि स्थगित गरिएको थियो ।

कोशी प्रदेशसभामा देखिएको यो टकरावलाई केवल प्रक्रियागत विवाद मात्र नभई आगामी बजेट, सत्ता–प्रतिपक्ष सम्बन्ध र प्रदेश सरकारको राजनीतिक स्थायित्वसँग जोडेर समेत हेरिएको छ ।