रवि लामिछानेको भारत भ्रमण तालिका सार्वजनिक, जेठ १८–२२ सम्म दिल्ली र अयोध्या जाने

काठमाण्डौं । राष्ट्रिय स्वतन्त्र पार्टी (रास्वपा) का सभापति रवि लामिछानेको भारत भ्रमणलाई लिएर राजनीतिक चासो बढिरहेका बेला पार्टीले भ्रमणको औपचारिक कार्यक्रम प्रस्थानको ठीक अघिल्लो रात मात्र सार्वजनिक गरेको छ ।  

भारतीय जनता पार्टी (भाजपा) ले निमन्त्रणासहित भ्रमणबारे जानकारी सार्वजनिक गरेपछि रास्वपाले पनि आफ्नो धारणा र तालिका सार्वजनिक गरेको हो ।

रास्वपाले जारी गरेको प्रेस विज्ञप्तिअनुसार सभापति लामिछाने जेठ १८ देखि २२ गतेसम्म भारत भ्रमणमा रहनेछन् ।  

भ्रमण भाजपा अध्यक्ष नितिन नवीनको निमन्त्रणामा हुन लागेको जनाइएको छ ।

पार्टीका अनुसार भ्रमणका क्रममा लामिछानेले नयाँदिल्लीमा राजनीतिक तथा कूटनीतिक तहका विभिन्न भेटवार्ता गर्नेछन् ।  

भारतीय सत्तारुढ दल भाजपा नेतृत्वसँग छलफल गर्नुका साथै नेपाल–भारत सम्बन्ध, समसामयिक राजनीतिक विषय र आपसी हितका मुद्दामा संवाद हुने अपेक्षा गरिएको छ ।

रास्वपाले भ्रमणलाई केवल राजनीतिक भेटघाटमा सीमित नराखी प्रवासी नेपाली समुदायसँगको अन्तरक्रियाको अवसरका रूपमा पनि प्रस्तुत गरेको छ ।  

भारतमा बसोबास गर्ने नेपाली समुदाय, शुभेच्छुक तथा समर्थकहरूसँग सभापति लामिछानेको भेटघाट कार्यक्रम तय गरिएको बताइएको छ ।

भ्रमण तालिकामा धार्मिक आयाम पनि जोडिएको छ । पार्टीका अनुसार लामिछाने व्यक्तिगत कार्यक्रमअन्तर्गत अयोध्या जानेछन् ।  

पछिल्ला वर्षहरूमा भारतीय राजनीतिक वृत्तमा धार्मिक कूटनीतिक महत्व बढिरहेका बेला अयोध्या भ्रमणलाई पनि अर्थपूर्ण रूपमा हेरिएको छ ।

भारत भ्रमणमा लामिछानेसँगै उनकी पत्नी निकिता पौडेल, रास्वपाका सहमहामन्त्री विपिन आचार्य तथा सचिवालय सदस्य दीपक बोहोरा र प्रदीप आचार्य सहभागी हुनेछन् ।

रास्वपाले नयाँदिल्लीस्थित नेपाली दूतावासले भ्रमणका क्रममा हुने उच्चस्तरीय भेटवार्ता र कार्यक्रम व्यवस्थापनमा समन्वयात्मक सहयोग गरिरहेको जनाएको छ ।

राजनीतिक वृत्तमा भने भ्रमणको समय, कार्यक्रम सार्वजनिक गर्ने ढाँचा र भारतीय पक्षबाट पहिला सूचना बाहिरिनुलाई पनि अर्थपूर्ण रूपमा हेरिएको छ ।  

रास्वपाले आफ्नो सभापतिको भ्रमणबारे औपचारिक जानकारी दिनुअघि नै भाजपाले विवरण सार्वजनिक गरेको विषयले कूटनीतिक तथा राजनीतिक सन्देशबारे थप चर्चा सुरु गराएको छ ।