दक्षिणी फिलिपिन्समा शक्तिशाली भूकम्पमा परेर ज्यान गुमाउनेको संख्या ३५ पुग्यो

काठमाण्डौ । दक्षिणी फिलिपिन्समा गएको शक्तिशाली ७.८ म्याग्निच्युडको भूकम्पले ठूलो जनधन क्षति पुर्‍याएको छ।  

प्रारम्भिक विवरणअनुसार मृतकको संख्या ३५ पुगेको छ भने २०० भन्दा बढी मानिस घाइते भएका छन्। 

अन्तर्राष्ट्रिय सञ्चारमाध्यम एपीका अनुसार उद्धार तथा खोजी कार्य अझै जारी छ।

फिलिपिन्स इन्स्टिच्युट अफ ज्वालामुखी तथा भूकम्प विज्ञानले यो भूकम्पलाई यस वर्ष देशमा आएको सबैभन्दा शक्तिशाली कम्पनका रूपमा उल्लेख गरेको छ।  

भूकम्पका कारण दक्षिणी क्षेत्रका विभिन्न शहर तथा गाउँहरूमा संरचनागत क्षति व्यापक रूपमा भएको छ।

सबैभन्दा बढी असर जनरल सान्तोस शहरमा देखिएको छ, जहाँ धेरै कम उचाइका भवनहरू भत्किएका वा गम्भीर रूपमा क्षतिग्रस्त भएका छन्।  

भग्नावशेषमा पुरिएर धेरै घाइते भएको प्रारम्भिक विवरणमा उल्लेख छ। उद्धारकर्मीहरूले प्रभावित क्षेत्रमा खोज तथा राहत कार्य तीव्र पारेका छन्।

भूकम्पपछि समुद्रमा करिब १ मिटर (३ फिट) सम्मको सुनामी छाल उत्पन्न भएको थियो, जसले दक्षिणी फिलिपिन्सका तटीय बस्तीहरूमा थप क्षति पुर्‍याएको छ। 

केही तटीय गाउँहरू डुबानमा परेका छन् भने स्थानीय बासिन्दाहरूलाई सुरक्षित स्थानमा सारिएको छ।

यस भूकम्पको प्रभाव फिलिपिन्समै मात्र सीमित नभई छिमेकी मुलुकहरू इन्डोनेसिया, पलाउ र दक्षिणी जापानका तटीय क्षेत्रमा पनि सामान्य सुनामी छालहरू मापन गरिएको अन्तर्राष्ट्रिय रिपोर्टमा उल्लेख छ।

त्यस्तै, सारंगानी प्रान्तको ग्लान नगरपालिकामा गएको पहिरोका कारण १३ जनाको मृत्यु भएको पुष्टि भएको छ।  

भूकम्प र पहिरोका संयुक्त असरले स्थानीय जनजीवन अस्तव्यस्त बनेको छ भने राहत तथा उद्धार कार्य चुनौतीपूर्ण बनेको छ।