पोखरा बसपार्क क्षेत्रमा अनधिकृत संरचना हटाउन डोजर चलाइयो

काठमाण्डौ । पोखरा महानगरपालिका वडा नम्बर ९ स्थित बसपार्क क्षेत्रभित्र रहेका अनधिकृत संरचनामा बिहीबार डोजर चलाइएको छ।  

महानगरपालिकाले बसपार्क विस्तार कार्यलाई अघि बढाउनका लागि अवरोध बनेका संरचना हटाउने अभियान अन्तर्गत सो कारबाही गरेको हो।

महानगरपालिकाका अनुसार उक्त क्षेत्रमा लामो समयदेखि अनधिकृत रूपमा निर्माण गरिएका संरचनाहरूका कारण बसपार्क विस्तार कार्य अघि बढ्न सकेको थिएन।  

यातायात व्यवस्थापन सुधार तथा सार्वजनिक सेवा विस्तारलाई ध्यानमा राख्दै ती संरचना हटाउने निर्णय गरिएको हो।

स्थानीय तहको योजनाअनुसार बसपार्क क्षेत्रलाई व्यवस्थित र विस्तार गर्ने लक्ष्य भएपनि अतिक्रमण र अनियमित निर्माणका कारण परियोजना अवरुद्ध हुँदै आएको थियो। 

सोही समस्यालाई समाधान गर्न महानगरले डोजर परिचालन गरी संरचना हटाएको हो।

महानगरपालिकाले सार्वजनिक सम्पत्तिको संरक्षण तथा पूर्वाधार विकासका लागि अनधिकृत निर्माणविरुद्ध यस्ता अभियान निरन्तर जारी रहने जनाएको छ।