अमेरिका–इरान वार्ता र फेडको ब्याजदर अपेक्षाबीच सुनको मूल्य पुनः बढ्यो, प्रतिऔंस कति पुग्यो ?

काठमाण्डौ । सोमबार सुनको मूल्य एक हप्ता नजिकको न्यूनतम स्तरबाट पुनः उकालो लागेको छ। आज विश्वबजारमा सुनको मूल्य ०.७५ प्रतिशत अर्थात ३१ डलरले बढ्दै प्रतिऔंस ४ हजार १७३ डलर पुगेको छ।

यसअघि गत शुक्रबार सुनको मूल्य जुन ११ यताकै न्यूनतम स्तरमा झरेको थियो। स्विट्जरल्याण्डमा जारी उच्चस्तरीय अमेरिका–इरान वार्तामा दुवै पक्षबीच प्रगति भएको इरानी विदेश मन्त्रालयका प्रवक्ताले बताएका छन्। मध्यस्थकर्ता देशहरू कतार र पाकिस्तानले संयुक्त वक्तव्य जारी गर्दै ६० दिनभित्र अन्तिम सम्झौताको रूपरेखा तयार गर्ने सहमति भएको जानकारी दिएका छन्।

बजारमा अमेरिका–इरान शान्ति वार्तामा प्रगति भएको संकेत आएपछि कच्चा तेलको मूल्य घटेको छ भने अमेरिकी केन्द्रीय बैंक फेडरल रिजर्भको कडा नीतिगत संकेतका कारण ब्याजदर बढ्ने अपेक्षाले सुनको भविष्यमा दबाब कायम रहेको छ।

शान्ति वार्तामा प्रगतिको संकेतपछि ब्रेन्ट क्रुड तेलको मूल्य १ प्रतिशतभन्दा बढीले घटेको छ। तेल मूल्य घट्दा मुद्रास्फीतिको दबाब कम हुने अपेक्षा गरिन्छ, जसले ब्याजदर बढ्ने सम्भावनालाई केही हदसम्म प्रभावित गर्न सक्छ। तर, सुन ब्याज नदिने सम्पत्ति भएकाले उच्च ब्याजदरको अपेक्षामा यसको आकर्षण घट्ने गर्छ।

यसैबीच, अमेरिकी फेडरल रिजर्भका अध्यक्षले मुद्रास्फीतिलाई प्राथमिकता दिँदै कठोर नीति संकेत गरेपछि बजारले निकट भविष्यमा ब्याजदर वृद्धि हुन सक्ने अनुमान बढाएको छ। सिएमई फेडवाच टुल अनुसार डिसेम्बरमा ब्याजदर वृद्धि हुने सम्भावना ८९ प्रतिशतसम्म पुगेको छ, जुन बैठकअघि ६१ प्रतिशत मात्र थियो।

यस्तै आज चाँदीको भाउ समेत बढेको छ । चाँदीको मूल्य आज २.५८ प्रतिशत अर्थात १.६६ डलरले बढेर प्रतिऔंस ६५.६५ डलर कायम भएको छ ।