कहिले आउँदैछ मौद्रिक नीति ? के आउँदैछ नयाँ ?

काठमाण्डौ । नेपाल राष्ट्रबैंकले आगामी आर्थिक वर्षका लागि यही साताभित्र मौद्रिक नीति सार्वजनिक गर्ने तयारी गरिरहेको छ ।  

राष्ट्रबैंकको सञ्चालक समितिका एक सदस्यका अनुसार व्यवस्थापनले तयार गरेको मौद्रिक नीतिको विषयमा छलफल गरी आवश्यक संसोधनसहित पारित गर्ने उद्देश्यले यही साताको कुनै दिन बैठक बोलाइने खबरहरु प्राप्त भइरहेका छन् । 

बैंकका केही उच्च अधिकारीहरुसँग बुझ्दा उनीहरुले पनि यही साताभित्र मौद्रिक नीति सार्वजनिक हुनसक्ने अड्कल गरेका छन् । 'तयारी हेर्दा यही साताभित्र आउनेजस्तो देखिन्छ ।' एक उच्च अधिकारीले भने-'तर बोर्ड नबोलाइएसम्म यसै भन्न सकिन्न । बोर्डले पारित गरेन भने पनि मौद्रिक नीति अनुमान गरिएकै समयभित्र नआउनसक्छ ।'  

राष्ट्रबैंकका प्रवक्ता गुरु पौडेलले मौद्रिक नीति कुन दिन सार्वजनिक गर्ने भन्ने ठ्याक्कै मिति तय नभइसकेको प्रष्ट पारे ।  

राष्ट्रबैंकका गभर्नर विश्व पौडेलले यसपटकको मौद्रिक नीतिलाई विशेष बनाउन खोजेका छन् । यसअघिका मौद्रिक नीतिहरुले धेरैजसो नियामकीय व्यवस्थाहरुमा फोकस हुने र बजारका धेरै मागहरुमा भद्रगोल शैलीमा केन्द्रीत हुने गर्दा अपेक्षा धेरै भएको विश्लेषणसहित उनले मौद्रिक नीतिमा कोर्स करेक्सन गर्न खोजिरहेका छन् । सञ्चालक समितिबाट त्यसमा साथ भयो भने यसपटकको मौद्रिक नीतिको स्वरुप नै परिवर्तन हुनसक्ने सम्भावना रहेको स्रोतहरु बताउँछन् । 

एक सञ्चालकका अनुसार मौद्रिक नीतिले सरकारले बजेट, नीति तथा कार्यक्रमबाट तय गरेको आर्थिक वृद्धिदरलाई सपोर्ट हुने गरी नीतिहरु ल्याउनेछ । सुस्त बनेको अर्थतन्त्रलाई चलायमान बनाउने तथा कमजोर मनोबलले प्रभावित निजी क्षेत्रको उत्साहमा उर्जा थप्ने गरी समेत कतिपय नीतिहरु आउँदैछन् । मौद्रिक नीतिले सेयर बजारमा पर्नसक्ने प्रभावहरुमा समेत विश्लेषण गरी सकेसम्म सहजीकरणको बाटो लिने समेत ती सञ्चालकको भनाई छ । 'मौद्रिक नीतिमार्फत सेयर बजारका लागि आवश्यक बुस्टर नीति ल्याउने कुरामा केन्द्रीय बैंक यसपटक चुक्दैन ।'-ती सञ्चालकले दाबीका साथ भने ।  

यसपटकको मौद्रिक नीतिबाट वित्तीय पारदर्शिता तथा अनुशासन कायम गराउने विषयमा समेत विशेष नीतिगत व्यवस्था तथा केही सरप्राइज घोषणाहरु समेत हुने अपेक्षा गरिएको छ ।