श्रीलङ्काको कारागारमा झडप, १९ जनाको मृत्यु; सयभन्दा बढी घाइते

काठमाडौं । श्रीलङ्काको राजधानी कोलम्बोनजिकै रहेको एक कारागारमा झडप हुँदा कम्तीमा १९ जनाको मृत्यु भएको छ । घटनामा सयभन्दा बढी कैदी घाइते भएका छन् ।

स्थानीय सञ्चारमाध्यमका अनुसार कोलम्बोबाट करिब ३५ किलोमिटर उत्तरतर्फ रहेको नेगोम्बो कारागारमा आइतबारदेखि सुरु भएको झडप सोमबारसम्म पनि नियन्त्रणमा आउन सकेको थिएन ।

नेगोम्बो अस्पतालकी निर्देशक पुष्पा गमलाथले एएफपीलाई दिएको जानकारीअनुसार अस्पतालमा ४ सुरक्षाकर्मी र १५ कैदीसहित १९ जनाको शव ल्याइएको छ । उनका अनुसार सयभन्दा बढी घाइते कैदीलाई उपचारका लागि अस्पताल भर्ना गरिएको छ ।

प्रहरी प्रवक्ता चन्दना हेराथले कारागारमा झडप भएको र मानवीय क्षति भएको पुष्टि गरे पनि घटनाबारे थप विवरण सार्वजनिक गरेका छैनन् ।

कडा सुरक्षा घेराभित्र रहेको कारागारमा यति ठूलो झडप कसरी सुरु भयो भन्ने विषय अझै खुलेको छैन । घटनापछि कारागार क्षेत्रमा सुरक्षा व्यवस्था थप कडा बनाइएको छ ।