राष्ट्रिय सभामा प्रधानमन्त्री बालेनको राजीनामा माग

 

काठमाण्डौ ।  राष्ट्रिय सभा सदस्य विष्णुबहादुर विश्वकर्माले गणेश नेपालीको मृत्युको नैतिक जिम्मेवारी लिँदै प्रधानमन्त्री बालेन शाहले राजीनामा दिनुपर्ने माग गरेका छन्।

शुक्रबार बसेको राष्ट्रिय सभा बैठकको शून्य समयमा बोल्दै नेकपाका सांसद विश्वकर्माले घटनामा सरकार र सुरक्षाकर्मीको भूमिकामाथि गम्भीर प्रश्न उठाए। उनले घटनाका क्रममा संवेदनशीलता नदेखाउने प्रहरी तथा सम्बन्धित सुरक्षाकर्मीमाथि निष्पक्ष छानबिन गरी कडा कारबाही गर्नुपर्ने बताए।

गणेश नेपालीमाथि मानवीय व्यवहार नगरिएको आरोप लगाउँदै उनले सरकारको कार्यशैलीलाई क्रूर र गैरजिम्मेवार भएको टिप्पणी गरे।

“घटनास्थलमा रहेका सुरक्षाकर्मीको व्यवहारबारे तत्काल छानबिन हुनुपर्छ। दोषी देखिएका ट्राफिक प्रहरी, नगर प्रहरी तथा अन्य सुरक्षाकर्मीलाई कडाभन्दा कडा कारबाही गरियोस्,” उनले भने।

सांसद विश्वकर्माले गणेश नेपालीको मृत्यु भएपछि पनि सरकार जिम्मेवारीबाट पन्छिन खोजेको आरोप लगाए। सरकारसँग नैतिकता बाँकी रहेको भए प्रधानमन्त्रीले तत्काल पदबाट राजीनामा दिनुपर्ने उनको भनाइ थियो।

“गणेश नेपालीको मृत्यु भइसकेको अवस्थामा सरकार कुर्सीमा टाँसिइरहनु उचित हुँदैन,” उनले भने, “नैतिकता छ भने प्रधानमन्त्री बालेन शाहले तुरुन्त राजीनामा दिनुपर्छ।”

गणेश नेपालीको मृत्युपछि सरकारको भूमिका, सुरक्षाकर्मीको व्यवहार र घटनाको निष्पक्ष छानबिनको माग गर्दै काठमाडौंमा विरोध प्रदर्शनसमेत भइरहेका छन्।